Եթե արտառոց բան չպատահի՝ մենք քայլ-քայլ գնալու ենք սահմանափակման ռեժիմների նվազեցման։ Այդ մասին ասել է վարչապետ Նիկոլ Փաշինյանը։ Այսինքն՝ կառավարությունն ընտրել է աստիճանական անցումը սահմանափակումների վերացման։ Հետևաբար, նշանակում է, որ համավարակով պայմանավորված իրավիճակը մեզ մոտ կառավարելի է, որն էլ մեզ հնարավորություն է տալիս բացել տնտեսությունը․ «Առաջին լրատվական»-ի դիտարկմանը տնտեսագիտության դոկտոր, պրոֆեսոր Աշոտ Մարկոսյանը պատասխանեց․ «Բոլորս լավ հասկանում ենք, որ համաճարակը մի օր ավարտվելու է, բայց բոլորս էլ հասկանում ենք, որ դա կապված է որոշակի դժվարությունների հետ։ Բնականաբար, որպեսզի այդ դժվարությունները մեծ ազդեցություն չթողնեն թե՛ բնակչության առողջության, թե՛ տնտեսության վիճակի վրա, պետք է դրան գնալ խելամիտ ձևով։ Գիտե՞ք՝ ինչ նկատի ունեմ։ Ընդհանրապես, տնտեսագետների մոտ ընդունված է ասել կամ ծրագիր, կամ էլ միջոցառումների ծրագիր։ Դրա համար, ինձ թվում է, եթե ցանկանում եք կառավարությունում դա համակարգված և արդյունավետ լինի, անպայման պետք է ունենալ որոշակի ծրագիր։ Ինձ թվում է, որ ամենահեշտ ձևերից մեկը պետք է լինի այն, որ գոնե առաջիկա մեկ տարվա համար ունենանք համապատասխան ծրագիր։ Ըստ որում՝ այդ ծրագիրը, իմ համոզմամբ, տարվա ընթացքում առնվազն չորս անգամ պետք է փոփոխության ենթարկել։
Երկրորդ կարևորագույն քայլը պետք է լինի այն, որ մեծ անորոշությունները, որոնց հետ կապված է լինելու ծրագիրը (դրանք հիմնականում դրսի ազդեցություններն են լինելու), պետք է ունենալ երեք մեծ սցենար՝ վատ, միջին և լավատեսական։ Ընդ որում, այդ բոլոր փոփոխություններին համապատասխան՝ եռամսյակը մեկ, քայլ առ քայլ պետք է կատարել հաջորդ քայլը։ Բայց այստեղ մի խնդիր կա, որն անպայման մենք չպետք է մոռանանք՝ առաջին հերթին պետք է պահպանել սոցիալական պայմանները, որոնք կապված են առողջության պահպանման հետ»։
Մանրամասները՝ տեսանյութում։
