«Կան որոշ հաշվարկներ, բայց քանի որ դեռևս խոսքը ընթացքի մասին է, ոչ թե ավարտուն գործընթացի, այս պահին հնարավոր չէ խոսել տնտեսության անկման չափի և խորության մասին: Տնտեսական կորուստներն ակնհայտ են, և Հայաստանը միակ երկիրը չէ: Թերևս Հայաստանի Հանրապետության տնտեսությունը, ի տարբերություն զարգացած երկրների, շատ ավելի մեղմ է տանում այս համաճարակը, ինչը պայմանավորված է օբյեկտիվ և սուբյեկտիվ պատճառներով»,- այս մասին «Առաջին լրատվական»-ի հետ զրույցում ասաց վարչապետի աշխատակազմի ղեկավար Էդուարդ Աղաջանյանը:
«Այս պահին դեռևս պահպանվում են որոշ սահմանափակումներ, և դրանց առկայության պայմաններում է, որ կարող ենք արձանագրել, որ իրավիճակը կառավարելի է: Որևէ մեկը չի կարող երաշխավորել, որ սահմանափակումները հանելու դեպքում առկա միտումը կառավարելիության սահմաններում կմնա, հետևաբար մեր որոշումներում պետք է զգույշ, մտածված լինենք, և դրա համար ոլորտների բացումը պետք է տեղի ունենա փուլ առ փուլ,- նշեց Էդուարդ Աղաջանյանը:- Կան պետություններ, որոնք չեն սահմանափակել քաղաքացիների տեղաշարժը, տնտեսական գործունեության տեսակները: Քանի դեռ այդ պետությունների առողջապահական համակարգը կարողանում է սպասարկել որոշակի թվով պացիենտների, այդ պարագայում որևէ սահմանափակում տրամաբանական չէ, բայց Հայաստանի Հանրապետության առողջապահական համակարգը, որը ժառանգել ենք նախկինից, ցավոք, պատրաստ չի եղել և հիմա էլ պատրաստ չէ այն պոտենցիալ վտանգին, որը կարող է բխել համավարակի հետևանքով»:
Մանրամասն՝ տեսանյութում:
