Այս տարի մենք հիշում ենք 1915 թվականին Թուրքիայում կատարված Հայոց ցեղասպանության 105-րդ տարելիցը:
Մենք հարգանքի տուրք ենք մատուցում 1 500 000 անմեղ հոգիներին, որոնք սպանվել են մարդկության դեմ ամենազզվելի հանցագործություններից մեկի ժամանակ: Այդ մասին ասվում է Հայոց ցեղասպանության 105-րդ տարելիցի առիթով Հունաստանի նախկին նախագահ Պրոկոպիս Պավլոպուլոսի ուղերձում:
Նա նշել է, որ Հայաստանն ու Հունաստանը բազում տասնամյակների ընթացքում համագործակցում են՝ պահպանելով սերտ բարեկամական հարաբերություններ խորհրդանշական սկզբունքների եւ արժեքների, խաղաղության, մարդու իրավունքների, արդարության, հատկապես, սոցիալական արդարության պաշտպանության բարդ ճանապարհին:
«Հայաստանի եւ Հունաստանի միջեւ այդպիսի անկեղծ բարեկամությունն ու սերտ համագործակցությունը նաեւ հիմնված է նահատակության վրա, որն ապրել են մեր ժողովուրդները: Դա մենք երբեք չենք մոռանա, քանի որ այդ հիշողությունը ոգեշնչում է մեզ եւ ուղղում դեպի ծառայությունը մեծ հումանիտար սկզբունքին՝ այլեւս երբեք»,- ընդգծել է նա:
«Մասնավորապես, մենք երբեք չենք մոռանա, որ նահատակության այդ պահերը համակված են բարբարոսական ցեղասպանությունների զոհերի արյամբ, մի կողմից՝ հայերի ցեղասպանության, մյուս կողմից էլ՝ պոնտացի հույների ցեղասպանության: Ինչպես հայտնի է, Հունաստանը 1996 թվականին ճանաչեց Հայոց ցեղասպանություն, իսկ 2014 թվականին քրեականացրեց դրա ժխտումը: 2015 թվականին ՀՀ ԱԺ-ն ճանաչեց պոնտացի հույների Ցեղասպանությունը»,-ասել է նա:
«Եվ մենք՝ հույներս, ողջունում ենք այն փաստը, որ Հայոց ցեղասպանության միջազգային ճանաչումն ընդլայնվում է, եւ ԱՄՆ Ներկայացուցիչների պալատի վերջին բանաձեւը դրա վառ ապացույցն է: Մենք թուրքերին ասում ենք, որ նրանք պետք է ներողություն խնդրեն մարդկության դեմ հանցագործության համար»,- շարունակել է նախկին նախագահը:
«Այդ մտքերով եւ հույսով, որ մենք երբեք չենք վերապրի նման ողբերգություններ, ես վստահեցնում եմ Ձեզ, որ մտապես Ձեր կողքին եմ Հայոց ցեղասպանության համընդհանուր ճանաչման համար պայքարում: Հավերժ հիշատակ ողբերգական Հայոց ցեղասպանության զոհերին»,- եզրափակել է նա:
