Ադրբեջանական APA լրատվական գործակալության փոխանցմամբ՝ Կովկասի հարցերով շվեդ վերլուծաբան Սոֆի Բեդֆորդն անդրադարձել է ղարաբաղյան հակամարտության կարգավորման հարցում առաջընթաց գրանցելու տարբերակներին.
«Եթե ԱՄՆ-ը որոշում ընդունի սեփական տարածքում Հայաստանի ու Ադրբեջանի միջև հանդիպումների անցկացման շարունակության մասին և բանակցային գործընթացում խաղա ավելի կարևոր դեր, ապա դա ի ցույց կդնի, որ Վաշինգթոնի համար այլևս անընդունելի է ստատուս-քվոն, ինչն իր հերթին կհանգեցնի անհրաժեշտ փոփոխության։
Սակայն այդպիսի նախաձեռնությունը կարող է վախեցնել Ռուսաստանին և Մինսկի խմբի ներսում տարաձայնություններ առաջացնել, ինչը կվնասի ցայսօր ձեռք բերված պայմանավորվածություններին։
Ոչ ոքի համար գաղտնիք չէ, որ շատ ադրբեջանցիներ թերահավատորեն են մոտենում բանակցային գործընթացում Ռուսաստանի մասնակցությանը՝ գտնելով, որ Ռուսաստանի ղեկավարությունը ներկայացնում է Հայաստանի շահերը և ձգձգում է հակամարտության կարգավորումը՝ տարածաշրջանում կայունության խախտման համար։
Այդ տեսանկյունից Հայաստանի ու Ադրբեջանի նախագահների մասնակցությամբ հանդիպումների կազմակերպչի դերում պետք է հանդես գա ոչ թե նախագահ Մեդվեդևը, այլ մեկ ուրիշը, ինչն ավելի ճիշտ կլիներ և առաջընթաց գրանցելու ավելի մեծ հնարավորություններ կստեղծեր։
Գոյություն ունի նաև մեկ այլ տարբերակ։ ԵՄ-ը պետք է ավելի սերտորեն ներգրավվի ղարաբաղյան հակամարտության կարգավորման գործընթացում։ Ցայժմ միջազգային մասնակիցները Մինսկի խմբին արտոնել են միայնակ զբաղվել բանակցային գործընթացում։
Հաշվի առնելով առևտրային, անվտանգության, օգնության ոլորտներում ԵՄ-ի ու Կովկասի միջև հարաբերությունների ընդլայնումը՝ բնական կլիներ, եթե տարածաշրջանում կայունության ապահովման համար ԵՄ-ն իր վրա պատասխանատվություն վերցներ հակամարտության կարգավորման համար։
Բանակցային գործընթացի վերսկսման դեպքում եթե դրան միանան նոր և ավելի չեզոք միջնորդներ, ապա դա կարող է նոր խթան հանդիսանալ բանակցային գործընթացի համար։
Գլխավորն այն է, որ բանակցությունները շարունակվում են։ Մի կողմից իրական արդյունքներ չկան, ինչը ցույց է տալիս, որ բանակցային գործընթացը մտել է փակուղի, իսկ մյուս կողմից էլ հնարավոր է՝ լինեն ոչ պաշտոնական արդյունքներ՝ փոխադարձ դիրքորոշումների հարցում ընդլայնված փոխըմբռնման տեսքով։ Քանի դեռ փոփոխություններ չկան, բանակցություններն ընթանալու են նույն ճանապարհով»։
