«Հրանտ Մաթևոսյան» մշակութային հիմնադրամի նախագահ Դավիթ Մաթևոսյանը՝ Հրանտ Մաթևոսյանի որդին, օրերս հայտարարություն էր տարածել, ըստ որի՝ ապրիլի 3-ին ՀՀ վարչապետի մոտ քաղաքաշինության հարցերով խորհրդակցություն է տեղի ունեցել։ Այդ խորհրդակցությանը մասնակցել են պատկան կոմիտեի և Երևանի քաղաքապետարանի ղեկավարները։ Հիմնադրամի նախագահը հիշեցնում է, որ «Մաթևոսյան» կենտրոնի վերաբերյալ 2019թ․ սեպտեմբերի 18-ի Նիկոլ Փաշինյանի հանձնարարականը չի կատարվել առ այսօր։
«Վարչապետի մոտ խորհրդակցությունն այն նպատակով էր, որպեսզի հասկանալի լինի, թե ինչ նպատակով չի շարունակվում շինարարությունը։ Եվ վարչապետը մանրամասն, կետ առ կետ հանձնարարական է տվել, որը, սակայն, չի կատարվել։ Մատենադարանում մենք շնորհանդես արեցինք, ուղարկեցինք պատկան մարմիններին, առաջին դեմքերից ոչ մեկն այդ շնորհանդեսին չծանոթացավ, բանավոր պարզաբանումներ կարողացանք տալ կրթության, գիտության, մշակույթի, սպորտի նախարարին և տեղակալին։ Շնորհանդեսն այդպես էլ չնայեցին, նայեցին միայն մասնագետ-պրոֆեսիոնալները՝ վարչության պետերը, խորհրդականները, բայց ոչ առաջին դեմքերը։
Քաղաքապետարանը չարձագանքեց մեր գրություններին, ղեկավարի կամ տեղակալների մակարդակով չմասնակցեց քննարկումներին։ Իսկ նախարարությունը պետք է այդ ամբողջն ի մի բերեր, վարչապետի հանձնարարականում հստակ նշված է, և զեկուցեին վարչապետին։ Դրա փոխարեն մենք ստացել ենք մի գրություն, որը կատարողական չէ և չի արտացոլում վարչապետի հանձնարարականը։ Մասնակի ինչ-որ առաջարկներ են տեղի ունենալիք քայլերի վերաբերյալ։ Հիմա ես անհանգիստ են կորոնավիրուսի պատճառով, անհանգիստ եմ, որ խորհրդակցության ամենասովորական կատարողականը չի ապահովվում, ինչի համար էլ ահազանգել եմ։ Պետք է հենց այս օրերին հստակեցնել, թե ինչու այդ մանրակրկիտ հանձնարարականը կյանքի չի կոչվում։ Ովքե՞ր են զբաղվում, ովքե՞ր պետք է այդ ամենն ապահովեն։ Սա շատ լուրջ խնդիր է, քանի որ կան շատ ավելի պատասխանատու ոլորտներ և խնդիրներ, որոնք Հայաստանը թե՛ այսօր, թե՛ առաջիկայում պետք է հաղթահարի։ Ես համարում եմ, որ դա պետական քաղաքականություն է, համարում եմ, որ մշակույթի ոլորտը, ինչպես միշտ, շարունակում է անտեսված ու արհամարհված մնալ։ Իսկ մշակույթի ոլորտն այն կարևորագույն մարտավարական ոլորտն է, որի վերաբերյալ մեր քաղաքական գործիչները, սիրուն խոսքեր ասելուց բացի, լրջմիտ վերաբերմունք չեն ցուցաբերել»,- <«Առաջին լրատվական»-ի հետ զրույցում ասաց Դավիթ Մաթևոսյանը։
Միաժամանակ նա հավելեց, որ ներդրումներն արվել են նախկին իշխանությունների օրոք, շինարարությունը սկսվել է իրենց օրոք հիմնադրամի հետևողական և քայլ առ քայլ, համառ կռիվների միջոցով։ Իսկ ներկա իշխանությունները շինարարությունն ավարտին հասցնելու համար որևէ գործնական քայլ մինչ այսօր չեն արել։
«Եղել է նամակագրություն մեր և պատկան մարմինների միջև։ Բայց նամակագրությունը գործնական քայլ չէ, խորհրդակցությունն է գործնական քայլ, որն արդյունք չի տվել»,- նշեց մեր զրուցակիցը։
