Իրանն ուսումնասիրում է հավանականությունն այն բանի, որ COVID-19 նոր կորոնավիրուսը կիրառվել է որպես կենսաբանական պատերազմի զենք: Այս մասին հաղորդել է Իրանի Զինված ուժերի գլխավոր շտաբի առողջապահության վարչության ղեկավար, բրիգադային գեներալ Հասան Արագիզադեն Mehr գործակալությանը տված հարցազրույցում:
«Բոլոր երկրներն այժմ ուսումնասիրում են այդ հարցը, որպեսզի հետևեն կենսաբանական պատերազմի հավանականությանը՝ թաքնված այս իրավիճակի հետևում (կորոնավիրուսի տարածման-խմբ.)»,- հայտարարել է Արագիզադեն:
Նա հավելել է, որ ներկա պահին իրանցի գիտնականները անցկացնում են հետազոտություն՝ պարզելու համար, թե կարո՞ղ է արդյոք նոր կորոնավիրուսի տարածումը լինել կենսաբանական պատերազմի միջոց: Այնուամենայնիվ, նրա խոսքով, նման եզրակացության հանգելու համար «անհրաժեշտ են ավելի շատ ժամանակ և ջանքեր»:
