Այսօր հրավիրված մամուլի ասուլսի ընթացքում կոալիցիայի կողմից երկխոսության աշխատանքային խմբում ընդգրկված ՀՀԿ-ական պատգամավոր Գագիկ Մինասյանը նշեց, որ առաջին հանդիպումից հետո, իհարկե, կլինեն շատ հանդիպումներ, կլինեն սուր քննարկումներ, բայց առաջին հանդիպման դրական լույսի պահպանման ներքո մեծ հաջողությունների կհասնենք:
Նա հիշեցրեց նաև Մարտի 1-ը և ընդգծեց, որ եթե այդ օրերին մենք ունենայինք երկխոսելու այս հարթակը, չէինք կանգնի ծանր հետևանքների առջև՝ որ ունեցանք: Լրագրողներից մեկի այն դիտարկմանը, թե 2008 թվականին ևս նույն դեմքերն էին, հիմա ո՞վ է այս դեպքում խելքի եկել, Գագիկ Մինասյանը արձագանքեց, որ բոլորն էլ խելքի են եկել, քանի որ իմաստնությունը ձևավորովում է փորձի վրա, և բոլորը ներկա պահին հասունացել են։ Իսկ թե Լևոն Տեր-Պետրոսյանն ու Սերժ Սարգսյանը կհանդիպե՞ն երկխոսության շրջանակում՝ ասաց, որ չի կարծում՝ եթե որևէ քաղաքական ուժ ցանկություն հայտնի, Սերժ Սարգսյանը հրաժարվի։
Որոշ ընդդիմադիր գործիչների ասածների առնչությամբ, թե այս ամենը թատերական ներկայացում է՝ Գ. Մինասյանը ասաց, որ ցանկացած լավ գործի դեպքում կան և՛ դրական լիցքերով կառուցողականի կողմանակիցներ, ովքեր մեծ ակնկալիքներ ունեն, և՛ թերահավատներ: Միաժամանակ նշեց, որ չի ցանկանում նրանց անվանել հակառակորդներ կամ թշնամիներ:
Ինչ վերաբերում է ՀԱԿ-ի նոր պահանջներին՝ ուղիղ եթեր, չեզոք վայր և այլն, Մինասյանն ասաց, որ եթե ՀԱԿ-ը ցանկանար, այդ ամենը իրենց կհասցեագրել, կփոխանցեր աշխատանքային խմբի միջոցով: Արտահերթ ընտրությունների առնչությամբ էլ ավելացրեց, որ իրենք բացառում են, բայց պատրաստ են քննարկել, ավելին համոզված է, որ նույնիսկ այդ դեպքում երկխոսությունը կշարունակվի, իսկ ՀԱԿ-ի կողմից մինչև սեպտեմբեր սահմանված արհեստական ժամկետը կառուցողական երկխոսության դեպքում կերկարաձգվի:
