Արցախի նորընտիր Ազգային ժողովում ներկայացված է լինելու 5 քաղաքական ուժ: Արցախում ընտրությունների երկրորդ փուլ է տեղի ունենալու, որը կկայանա ապրիլի 14-ին: Արցախի նախագահի հինգ թեկնածուներից առավելագույն ձայներ են հավաքել նախկին վարչապետ Արայիկ Հարությունյանը և Արցախի արտգործնախարար Մասիս Մայիլյանը:
Արցախյան համապետական ընտրություններն աննախադեպ էին: Մարդկային զարգացման միջազգային կենտրոնի նախագահ Թևան Պողոսյանի գնահատմամբ՝ Արցախյան ընտրությունները հաղթական էին «ժողովրդավարության զարգացման, ընտրություններին մեծ թվով մասնակցության իմաստով, ինչպես նաև նրանով, որ Արցախի Սահմանադրությունը մտավ ուժի մեջ»: «Արցախցիները կարգապահ են, ամեն ինչ արեցին, որ ընտրությունները տեղի ունենան: Հետաքրքիր է, որ վերջին մեկ տարվա ընթացքում Արցախում ավելի շատ կուսակցություն գրանցվեց, քան 30 տարվա ընթացքում էր գրանցվել: Փորձառուների կողքին նաև երիտասարդ դեմքեր հայտնվեցին, որոնք պատրաստ էին ստանձնել պատասխանատվություն: Հաղթանակ է, որ Արցախում տեղի ունեցան նախագահական ընտրություններ»:
Անդրադառնալով դիտարկմանը, որ Արցախի նախագահի ընտրության երկրորդ փուլ դուրս եկած թեկնածուներից Մասիս Մայիլյանը նախօրեին կոչ է արել ընտրողներին չմասնակցել ապրիլի 14-ին երկրորդ փուլի քվեարկությանը, քանի որ կա կորոնավիրուսի համաճարակի ռիսկ, Թևան Պողոսյանը նշեց. «Մասիս Մայիլյանն այն թեկնածուն է, որ մինչև մարտի 31-ի ընտրություններն էլ է բարձրաձայնել համաճարակի վտանգի մասին և պատրաստ է եղել ընտրությունների հետաձգմանը: Բայց գնացել է ընտրությունների, չի հանել թեկնածությունը, իրավական դաշտում ընտրությունները կայացել են, և սա քաղաքական հայտարարություն է: Ցանկացած պարագայում արցախցին է որոշելու՝ ընտրությունները կլինեն լեգիտիմ, թե ոչ լեգիտիմ»: Թևան Պողոսյանի կարծիքով՝ Արցախում ընտրությունների երկրորդ փուլին չի լինելու մեծ մասնակցություն: Նրա խոսքով՝ կարևոր է ապահովել մասնակցության անվտանգությունը:
Մանրամասն՝ տեսանյութում:
