Նախկինում ընդդիմադիր գործիչ, Քրիստոնեաժողովրդավարական կուսակցության նախագահ Սոս Գիմիշյանը տարվա ընթացքում արտագնա աշխատանքի է մեկնում Ռուսաստանի դաշնություն։ Այժմ նա աշխատում է Կրասնոդարի երկրամասի Կուշչյովսկայայի շրջանում։
«Մարտի 10-ին եկել եմ ՌԴ, աշխատանքի մեջ եմ։ Առանձնակի սահմանափակումներ չկան, նույն պահանջներն են մեզ ներկայացնում, ինչ ներկայացնում են Ռուսաստանի Դաշնության քաղաքացիներին։ Աշխատում ենք պահպանել կարգ ու կանոնը, որպեսզի խուսափենք կորոնավիրուսի հարուցած խնդիրներից։ Քանի որ իմ աշխատանքը գրասենյակային է, մեկ-մեկ գալիս եմ, տվյալները վերցնում եմ, տանն եմ կատարում աշխատանքը։ Աշխատում եմ շաբաթը մեկ-երկու անգամ լինել աշխատավայրում։ ՌԴ մուտք գործելուց հետո երկու շաբաթ պահպանել եմ կարանտինը, հիմա էլ աշխատանքս իրականացնում եմ տնային պայմաններում, տնտեսական հարցերով եմ զբաղվում, օպտիմալացման խնդիրներով, օպտիմալ կառավարման համակարգով»,- «Առաջին լրատվական»-ի հետ զրույցում ասաց Սոս Գիմիշյանը։
Սոս Գիմիշյանն ասում է, որ Հայաստանում չի կարողացել աշխատանք գտնել, ընտանիքի սոցիալական խնդիրները հոգալ, ինչի պատճառով էլ ստիպված է եղել մեկնել արտագնա աշխատանքի։
Ինչ վերաբերում է ՌԴ-ում կորոնավիրուսի դեպքերին, ապա մեր զրուցակիցը նշում է, որ որքան շատ լինեն թեստավորված անձինք, այնքան պատկերը պարզ կլինի։
Սոս Գիմիշյանի հավաստմամբ՝ «Հիմա բավականին ակտիվ թեստավորում են մարդկանց։ Որքան գիտեմ՝ հիմա օրական մինչև 30 հազար թեստ է անցկացվում։ Այդ ընթացքում հիվանդների թիվը, կարծում եմ, կաճի։ Այն շրջանում, որտեղ ես ապրում եմ, դեռ կորոնավիրուսի արձանագրված դեպք չկա։ Այստեղ փորձում են խստացնել իրավիճակը, մարդիկ կատարում են պահանջները, տնային պայմաններում են աշխատում։ Փակվում են շուկաները, մեծ խանութները, միայն սննդի խանութներն են աշխատում։ Ուսումնական հաստատությունները, մշակութային օջախները չեն գործում։ Քաղաքային տրանսպորտը չի գործում։ Հնարավորինս փորձում են սահմանափակել շփումները։ Հետևում եմ, տեսնում եմ, թե ինչ միջոցառումներ են ձեռնարկվում նաև Հայաստանում»։
Հարցին, թե սահմանափակե՞լ են ՌԴ-ում ԶԼՄ-ների գործունեությունը, Սոս Գիմիշյանն արձագանքեց, որ չկա նման որոշում, նման քայլեր չեն ձեռնարկում իշխանությունները։ Նա ճիշտ չէ համարում ԱԺ-ի կողմից «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին նախագծերի փաթեթի ընդունումը։
«Չի կարելի մարդկանց իրավունքներն այդ աստիճան սահմանափակել։ Իհարկե, ինչ-ինչ միջոցներ պետք է ձեռնարկել արտակարգ դրության պայմաններում, բայց պետք չէ վախենալ, խուճապի մատնվել, նպաստել եղած քաոսային վիճակին։ Պետք չէ օգտվել դրանից և սահմանափակել մարդկանց իրավունքները, նրանց կառավարելի դարձնել»,- կարծում է Սոս Գիմիշյանը։