Մենք այսօր տեղեկացրել էինք, որ 1991-1995 թթ. նախկին հարավսլավական Խորվաթիայի Հանրապետությունում Սերբսկայա Կրաինայի ինքնակոչ նախագահ Գորան Հաջիչն այսօր ձերբակալվել է Սերբիայում: Նրան մեղադրում են մարդկության դեմ գործած հանցագործությունների մեջ:
Այսօր սերբական «Պրավդա» թերթը գրել է, որ հնարավոր է՝ Հաջիչը թաքնվել է Ռուսաստանի տարածքում: «Հաջիչը 2004 թ. իր անհետանալու պահից, երբ նրա դեմ մեղադրանքներ էին առաջադրվել, գտնվել է Ռուսաստանում»,- գրում է «Պրավդան»՝ նշելով, որ այդ մասին իմացել են սերբական հատուկ ծառայություններն ու երկրի ղեկավարությունը, որոնք տեղեկություններ են ստացել Ինտերպոլից:
Թերթը չի նշում, թե կոնկրետ որտեղ է թաքնվել Հաջիչն այդ ժամանակահատվածում: Նշվում է, որ վերադառնալուց հետո նա ապրել է Վոյևոդինա և մի շարք այլ քաղաքներում: Հիշեցնենք նաև, որ Հաջիչը վերջին սերբն է, որին Հաագայի միջազգային դատարանը մեղադրում է մարդկության դեմ գործած հանցագործությունների մեջ:
