Տարեկան Հայաստանից Վրաստան է արտահոսում շուրջ 300 մլն դոլար: Ինչպես այսօր «Նովոստի» միջազգային մամուլի կենտրոնում «Կապիտալների փախուստ՝ հետխորհրդային տարածության ֆենոմենը» թեմայով Երևան-Մոսկվա տեսակամուրջի ժամանակ նշեց «Այլընտրանք» վերլուծական կենտրոնի ղեկավար, տնտեսագետ Թաթուլ Մանասերյանը, միայն զբոսաշրջային սեզոնին հայ զբոսաշրջիկները Վրաստանում են թողնում մոտ 100 մլն դոլար, նաև հայ գործարարներն են ներդրումներ անում ծովափնյա հանգստավայրերում՝ հյուրանոցների, ենթակառուցվածքների շինարարության մեջ:
«Կա պաշտոնական և ոչ պաշտոնական վիճակագրություն: Ոչ բոլոր ներդրումներն են արվում բանկերի միջոցով»,- ասաց Թ. Մանասերյանը՝ նկատելով, որ հայ գործարարները ներդրումներ են անում նաև Վրաստանի տնտեսության այլ ճյուղերում:
Նրա խոսքով, վրացական իշխանությունների իրականացրած տնտեսական բարեփոխումներից հետո բիզնես միջավայրը գրավիչ է դարձել, վերացվել են վարչական խոչընդոտները, պետությունը հնարավորինս հեշտացնում է բիզնես սկսելու և վարելու գործընթացը:
Թ. Մանասերյանը մեջբերեց Վրաստանում կատարված հարցումների արդյունքները. մի քանի տարի առաջ «կաշառք տվել կամ վերցրել եք» հարցին հարցվածների 90 %-ը դրական է պատասխանել, այն դեպքում, երբ ներկայումս լրիվ հակառակ պատկերն է, և կաշառքի հետ գործ է ունեցել միայն 10 %-ը: Տնտեսագետի խոսքով, Հայաստանում կոռուպցիայի դեմ պայքար տարվում է, բայց արդյունք չկա:
Անդրադառնալով հարկային դաշտին՝ Թ. Մանասերյանը նշեց, որ չափերի տեսակետից Հայաստանում և Վրաստանում վիճակը շատ չի տարբերվում, սակայն Վրաստանում տնտեսության զարգացման համար կարևոր ճյուղերում գործարարներին տրվում են զգալի հարկային արտոնություններ:
