ՄԱԿ-ում Հայաստանի մշտական ներկայացուցիչ Կարեն Նազարյանը նամակ է հղել կառույցի գլխավոր քարտուղար Բան Գի-Մունին, որտեղ մեղադրել է Ադրբեջանի իշխանություններին պատմական փաստերը աղավաղելու, բանակցային գործընթացը խոչընդոտելու և ռազմական գործողություններ հրահրելու մեջ։ «Իր ագրեսիվ դիրքորոշումը արդարացնելու համար Ադրբեջանը թշնամություն, ռասայական ատելություն և նախապաշարումներ է սերմանում Հայաստանի և Լեռնային Ղարաբաղի նկատմամբ: Ցավոք, չնայած Հայաստանի բազմաթիվ հորդորներին, ՄԱԿ-ի կառույցները, մասնավորապես` ՅՈւՆԵՍԿՕ-ն, որևէ ուշադրություն չեն դարձնում վանդալիզմի այդ փաստերին», – ՄԱԿ-ի գլխավոր քարտուղարին գրել է Կարեն Նազարյանը։
Նա նաև ընդգծել է. «Առաջին իսկ օրվանից Ադրբեջանը որդեգրել է Ղարաբաղյան խնդիրը ուժային միջոցներով լուծելու քաղաքականություն: Շարունակելով այդ քաղաքականությունը` Ադրբեջանը հաշվի չի առնում ՄԱԿ-ի գլխավոր քարտուղարի, ԵԱՀԿ-ի անդամ երկրների, Մինսկի խմբում համանախագահող պետությունների և այլ կառույցների հորդորները` հրադադարի ռեժիմը ամրապնդելու ուղղությամբ, միջադեպեր է հրահրում շփման գծում և փորձում է խոչընդոտել ԵԱՀԿ-ի ՄԽ շրջանակներում իրականացվող բանակցային գործընթացին»։
«Եթե Ադրբեջանը իսկապես շահագրգռված է Ղարաբաղյան խնդրի կարգավորմամբ, ապա պետք է իր էներգիան և միջոցները ուղղի բանակցային գործընթացում իրական, ոչ թե ձևական դեր ստանձնելուն», – ՄԱԿ-ի գլխավոր քարտուղարին գրել է կառույցում Հայաստանի ներկայացուցիչը։
