ՀՀ քաղաքական գործիչ, Ազգային ժողովի պատգամավոր Հովհաննես Սահակյանը «Առաջին լրատվականի» հետ զրույցում, խոսելով իշխող կոալիցիայի կազմած աշխատանքային խմբի և ՀԱԿ ներկայացուցիչների ձևավորած պատվիրակության անդամների երեկվա հանդիպման մասին, դրական գնահատեց այն։
Նա նշեց, որ երեկվա հանդիպումը մի նոր ավանդույթի ձևավորման հիմք դրեց, երբ հակառակ դիրքերում գտնվող մարդիկ կարողացան «բավական դրական լիցքեր հաղորդել հասարակությանը»։ Պատգամավորը կարևորեց երկու կողմերի միջև հետագա համագործակցության ընթացքը, օրակարգի ձևավորումը, «ողջամիտ հարցերի» ընդգրկումը։
«Մենք մեկ քայլ առաջ կգնանք մեր քայլերում՝ կապված ընդդիմության ու իշխանության առաջարկների հետ։ Մթնոլորտը պետք է լինի կառուցողական ու դրական, որ կողմերը կարողանան ազատորեն որոշակի հարցեր քննարկել»,- ավելացրեց Հ.Սահակյանը։
Ըստ նրա՝ ամեն ինչ ավելի կորոշակիանա երկրորդ հանդիպումից հետո, երբ օրակարգի շուրջ որոշակի հարցեր հստակեցվեն։
Հ.Սահակյանը մի շատ կարևոր հանգամանք նշեց, ըստ որի՝ ընտրություններին ընդառաջ «ստեղծված մթնոլորտը հասարակության մեջ հանդարտություն կներարկի ու կամրապնդի հասարակության վստահությունը»,- խոսքը եզրափակեց պատգամավորը։
