Փետրվարի 24-ին տեղի ունեցան խորհրդարանական լսումներ, որտեղ քննարկվեցին բարձրագույն կրթության և գիտության ոլորտների օրենսդրական բարեփոխումները և հիմնախնդիրները: Մասնակցում էին պատգամավորներ, գործադիր մարմնի պատասխանատուներ, կրթության ոլորտի մասնագետներ, քաղհասարակության ներկայացուցիչներ: Նշվեց, որ օրինագիծը հեղափոխական փոփոխություններ է նախատեսում: Թեմայի շուրջ «Առաջին լրատվական»-ի հետ զրույցում իրենց դիտարկումները ներկայացրին Մատենադարանի աշխատողների արհմիության նախագահ, ավագ գիտաշխատող Գայանե Այվազյանը և Կրթական քաղաքացիական նախաձեռնության անդամ Լուսինե Խառատյանը:
«Հեղափոխական փոփոխություններ ասելով՝ երևի նկատի ունեն նաև այն, որ գիտության և կրթության մասին օրենքը ներկայացված համատեղ և նախատեսվում է, որ գիտությունը բարձրագույն կրթության ակտիվ մաս պետք է կազմի: Բայց հստակ չէ, թե ինչ ճանապարհով է գիտությունը ինտեգրվելու կրթությանը, չկան հստակ մեխանիզմներ, հետագայում հավանաբար դրանք ևս կկանոնակարգվեն»,- նշեց Լուսինե Խառատյանը: Նրա գնահատմամբ՝ ելույթ ունեցողների մեծ մասը գովերգում էին օրենքը, ընդամենը 2 մարդու խոսք էր հեղափոխական:
Գայանե Այվազյանը նշեց, որ ակնկալում էր ավելի առարկայական քննարկումներ, բայց, ցավոք,քննարկումներն այդպիսին չէին. «Կոնյուկտուրային վերաբերմունք կար, որը ներդրել էին հենց քննարկումը կազմակերպողները… Հասկանալի չէր նաև, թե ինչու էին պատգամավորները ընդգրկված որպես ելույթ ունեցողներ, որովհետև նրանք էականորեն կրճատում էին հանրային ներկայացուցիչների խոսքի ժամանակը: Ոլորտը ներկայում կառավարող մարդիկ շարունակում են անցյալի սկզբունքներով հարաբերվել ներկա իշխանության հետ: Ավելի շատ մասնագիտական շահերից դրդված ելույթներ էին, և կոնյուկտուրա ներկայացնող մարդիկ կարծես թե կոնյուկտուրան չխաթարելու պահանջ էին իրենց առաջ դրել և այդ դիրքերից էին հանդես գալիս…»:
Մանրամասն՝ տեսանյութում: