«Հարավկովկասյան երկաթուղի» ՓԲԸ-ի հետ կապված երկու քրեական գործ է հարուցվել․ մեկը՝ հեղափոխությունից առաջ, 2018թ․ ապրիլի 7-ին, մյուսը՝ հեղափոխությունից հետո, 2019թ․ դեկտեմբերի 9-ին։
Առաջինը վերաբերում է «Հարավկովկասյան երկաթուղի» ՓԲԸ Գյումրու լոկոմոտիվային դեպոյում պաշտոնեական դիրքն օգտագործելով, մի խումբ անձանց կողմից նախնական համաձայնությամբ խոշոր և առանձնապես խոշոր չափերի գումարներ խարդախությամբ հափշտակելու և փաստաթղթեր կեղծելու առերևույթ հանցագործությունների դեպքին։
«ՀՀ գլխավոր դատախազությունից, ՀՀ ոստիկանության ԿՀԴՊ գլխավոր վարչությունում 2018թ. մարտի 29-ին ստացվել է «Հարավկովկասյան երկաթուղի» ՓԲ ընկերության գլխավոր տնօրեն Ս. Վալկոյի հաղորդումն այն մասին, որ նույն ընկերությունում անցկացված՝ աշխատողների աշխատանքի վարձատրման սկզբնական փաստաթղթերի ստուգմամբ պարզվել է, որ Գյումրու լոկոմոտիվային դեպոյի շարժակազմի տնօրինության աշխատանքի կազմակերպման և նորմավորման, ինչպես նաև կադրերի գծով երկու աշխատակիցներ կատարել են հափշտակություններ»,- նշված էր պաշտոնական հաղորդագրության մեջ:
Երկրորդը վերաբերում է «Հարավկովկասյան երկաթուղի» ՓԲԸ-ի իրավունքների և օրինական շահերի խախտմանը, ինչպես նաև ՀՀ օրինական շահերի խախտմանը, որոնք պետության համար առաջացրել են ծանր հետևանքներ։
Գլխավոր դատախազության պետական շահերի պաշտպանության վարչությունում դեպքի առթիվ Քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ, հարուցվել է քրեական գործ։ Գործի նախաքննությունը հանձնարարվել է Քննչական կոմիտեին: Փետրվարի 10-ին «Հարավկովկասյան երկաթուղի» ՓԲԸ տնօրենների խորհրդի որոշմամբ՝ ընկերության գլխավոր տնօրենի պաշտոնում նշանակվեց Մելնիկով Ալեքսեյ Վալերևիչը:
Թավշյա հեղափոխությունից ամիսներ անց ՀՀ վարչապետ Նիկոլ Փաշինյանը, Մոսկվա կատարած այցից և ՌԴ նախագահ Վլադիմիր Պուտինի հետ հանդիպումից հետո «Կոմերսանտ» թերթին տված հարցազրույցում պատասխանելով «Ռուսական երկաթուղիներ» ընկերության հայկական մասնաճյուղում իրականացված խուզարկությանը վերաբերող հարցին, խոսել էր «Հարավկովկասյան երկաթուղի» ՓԲԸ-ում կատարված 60 միլիոն դոլարի հասնող չարաշահումների մասին։
Ի՞նչ ընթացք ունեցան հարուցված քրեական գործերը։
Հարցն ուղղեցինք ՀՀ քննչական կոմիտեին։
«ՀՀ գլխավոր դատախազության պետական շահերի պաշտպանության վարչությունում՝ «Հարավկովկասյան երկաթուղի» ՓԲ ընկերությանը փոխանցված կոնցեսիոն ակտիվների կազմից հանելու և օտարելու գործընթացի վերաբերյալ ՀՀ տարածքային կառավարման և ենթակառուցվածքների նախարարի կողմից տրամադրված տեղեկությունների հիման վրա իրականացված ուսումնասիրության արդյունքում պաշտոնատար անձանց կողմից իրենց ծառայողական պարտականությունները չկատարելու արդյունքում ծանր հետևանքներ առաջացնելու դեպքի առթիվ ՀՀ քրեական օրենսգրքի 308-րդ հոդվածի 2-րդ մասով հարուցված քրեական գործը գտնվում է ՀՀ քննչական կոմիտեի հատկապես կարևոր գործերի քննության գլխավոր վարչության ընդհանուր բնույթի և ընտրական հանցագործությունների քննության վարչության վարույթում, որով կատարվում է նախաքննություն»,- ի պատասխան մեր առաջին հարցի՝ արձագանքել են ՀՀ քննչական կոմիտեից։