Երեկվանից լրահոսում ամենատաք թեմաներն առնչվում են հակակոռուպցիոն պայքարի մասին վարչապետ Նիկոլ Փաշինյանի դիտարկումներին և Սահմանադրական հանարքվեի «Այո»-ի լոգոյի շուրջ քննարկումներին:
Հիշեցնենք՝ նախօրեին վարչապետը խորհրդակցություն է անցկացրել կոռուպցիայի դեմ պայքարի թեմայով: Ն. Փաշինյանի դիտարկմամբ՝ իրավապահ համակարգի բարձր պաշտոններում եղել են բառի բուն իմաստով դավաճաններ, որոնք խանգարել են հակակոռուպցիոն հետհեղափոխական պայքարին, և այսօր էլ կան խանգարողներ:
Այս թեմաների շուրջ «Առաջին լրատվական»-ի հետ քննարկմանը մասնակցեցին կառավարման հարցերի փորձագետ Հայկ Այվազյանը, ԱԺ «Իմ քայլը» խմբակցության պատգամավոր Գևորգ Պապոյանը և քաղաքագետ, «Քաղաքացու որոշում» կուսակցության գործադիր մարմնի անդամ Հայկ Սահակյանը:
Հայկ Այվազյանի խոսքով՝ վարչապետի հայտարարությունը պայմանավորված է լուրջ խնդիրների առկայությամբ. «Սակայն զուտ արտահայտությունները քիչ են, դրանց պետք է հետևեն գործողություններ: Իմ կարծիքով՝ ոստիկանության ղեկավարումը զուտ բարձրացնելով քաղաքական մակարդակի, ոստիկանության բուն խնդիրները չեն լուծվի, մեկ մարմնի փոփոխությամբ շատ քիչ բան կփոխվի և չենք հասնի այն արդյունքին, որն ուզում ենք: Խնդիրը գլոբալ է, իրավապահ համակարգում հստակ գծեր պետք է գծվեն»:
Գևորգ Պապոյանի խոսքով՝ երեկվա նիստը խնդիրների առկայության արձանագրումն է: «Չնայած նրան, որ բացահայտումները և վերադարձված գումարները տասնապատիկ, հարյուրապատիկ ավելի շատ են, քան նախորդ տարիներին, բայց այդ թվերը մեզ չեն բավարարում… Վարչապետը խոսեց սաբոտաժի մասին և տվեց համապատասխան բնորոշում՝ «դավաճանական»: Նիստի փակ հատվածը արձանագրված խնդիրների լուծումներին էր վերաբերում, և նոր որակի աշխատանքի սկիզբ է դրվել: Դրան զուգահեռ մենք սկսել ենք որոշակի բարեփոխումներ նաև օրենսդրական դաշտում, որոնք նույնպես պետք է մոտեցնեն վերջնական նպատակին»,- նշեց պատգամավորը՝ վստահեցնելով, որ առաջիկա մեկ-երկու տարիներին էականան փոփոխություններ են լինելու:
«Խնդիրներն ակնհայտ էին… հարց է առաջանում՝ ինչո՞ւ մինչև հիմա չունենք համակարգային փոփոխություններ, կարևոր է, թե ինչ մեթոդներով են դրանք իրականացվելու,- նշեց Հակ Սահակյանը: – Ոստիկանությունը արդյո՞ք մեր շահերը պաշտպանող մարմին է, թե ոչ, եթե վարչապետը հայտարարում է, որ այնտեղ կան դավաճաններ: Ովքե՞ր են դավաճանները և ինչո՞ւ քրեական գործեր չեն հարուցվում»:
Մանրամասն տեսանյութում:
