Грузия Online-ի փոխանցմամբ՝ Վաշինգթոնում վրաց-ամերիկյան ռազմավարական գործընկերության խարտիայի շրջանակներում տեղի է ունեցել պաշտպանության ու անվտանգության հարցերով աշխատանքային խմբի 4-րդ հանդիպումը։
Երկու ժամ տևած այդ հանդիպման ժամանակ քննարկվել է պաշտպանության ու անվտանգության ոլորտներում երկկողմանի համագործակցությանն առնչվող հարցերի լայն շրջանակ։ Խոսքը պաշտպանական ոլորտի վերափոխման, պաշտպանունակության, ռազմական կրթության և ռազմական դոկտրինի զարգացման մասին է։
Հանդիպման ժամանակ քննարկվել է նաև ՆԱՏՕ-ին Վրաստանի անդամակցության «ճանապարհային քարտեզը»։ Վրացական կողմը ներկայացրել են փոխարտգործնախարար Սերգի Կապանաձեն, ՆԳՆ-ի վերլուծական դեպարտամենտի ղեկավար Շոթա Ուտիաշվիլին և պաշտպանության նախարարի առաջին տեղակալ Նոդար Խարշիլաձեն։
Ամերիկյան կողմից հանդիպմանը մասնակցել են Եվրոպայի և Եվրասիայի հարցերով ԱՄՆ պետքարտուղարի օգնականի տեղակալ Էրիկ Ռուբինը և պաշտպանության նախարարի օգնականի տեղակալ Ալեքսանդր Վերշբոուն։
Վրացական պատվիրակության ղեկավար Կապանաձեի խոսքերով՝ երկխոսության ընթացքում հիմնական ուշադրությունը հատկացվել է այն վտանգներին (ահաբեկչություն), որոնք ամեն օր սպառնում են Վրաստանին։
Հիշեցնենք, որ Վրաստանի և ԱՄՆ-ի միջև հարաբերությունները հաստատվել են 1992 թվականին։ Իսկ Ռազմավարական գործընկերության մասին խարտիան Վաշինգթոնում ստորագրվել է 2009 թվականի հունվարի 9-ին։ Ամերիկյան կողմից այն ստորագրել է տվյալ ժամանակվա պետքարտուղար Քոնդոլիզա Ռայսը, իսկ վրացական կողմից՝ Գրիգոլ Վաշաձեն։