Սերժ Սարգսյանի դատական գործով առաջին նիստին՝ ի թիվս ՀՀԿ-ական նախկին պաշտոնյաների, դատարանի բակում նախկին նախագահին աջակցելու էր եկել նաև արտահերթ ընտրությունների միջոցով կրկին Ուրցաձորի համայնքապետի պաշտոնին վերադարձած Ռաֆիկ Անդրեասյանը, որը, սակայն, նախկինում մշտապես պնդել է, որ ինքը կուսակցական չէ, նախկին իշխանությունների «մարդ»-ը չէ:
Ռաֆիկ Անդրեասյանը երեկ դատարանի բակում Արայիկ Գրիգորյանի՝ Ավշարի Արայիկի հետ էր կանգնած:
«Առաջին լրատվական»-ը Անդրեասյանից հետաքրքրվեց՝ ինչն էր բերել իրեն դատարանի բակ։ «Ես երբեք ՀՀԿ-ական չեմ եղել, բայց ՀՀԿ-ական լինելը կապ չունի նախագահի անձի հետ: Ինքը մեր համայնքի համար էնքան բան է արել: Ես, լինելով համայնքի ղեկավար, ինչ պահանջ դրել եմ, ինքը հետևողական է եղել և դա դարձրել է իրականություն: Ես անձնական հարգանք ունեմ Սերժ Սարգսյանի նկատմամբ իր խոսքի տերը լինելու համար: Իսկ ես կուսակցական բաների մեջ չեմ մտնում»,-ասաց Ուրցաձորի գյուղապետը:
Մեր հարցին՝ հրապարակավ իր աջակցությունը հայտնելով Սերժ Սարգսյանին, դա նշանակո՞ւմ է, որ դեմ է գործող իշխանությանը, Անդրեասյանը պատասխանեց. «Ես դեմ եմ կեղծիքին, ստին, անբարոյականությանը: Ես դեռ արդյունք չեմ տեսել: Ես էդ ցուցմունք տվողներին գիտեմ, ճանաչում եմ: Նախարարը տենց ցուցմունք է տվել, շեղվել է, փրփուրներից է կախվել… ես սա եմ տեսնում: Ինչ վերաբերում է գործողներին, ապա ես ոչ մեկին դեմ չեմ: Ես դեմ եմ վատ բաներին: Ով լավ բան է անում, ես նրա մեջքին կանգնում եմ: Դրականն էլ է պետք գնահատել»:
Հարցին՝ դուք է՞լ եք ՀՀԿ-ականների պես համարում, որ Սերժ Սարգսյանի նկատմամբ քաղաքական հետապնդում է իրականացվում, Անդրեասյանը պատասխանեց. «Դուք էդ հարցերի պատասխանը ինձնից լավ գիտեք: Ինձ քաղաքական հարցեր մի տվեք: Ես մարդկային առումով եմ գնացել: Իսկ ինչ վերաբերում է քաղաքական հետապնդմանը, ապա գործի ծերը դեռ չի երևում, կտեսնենք»:
Հիշեցնենք, որ 2018-ի աշնանը Ուրցաձորի մի խումբ բնակիչներ տևական ժամանակ բողոքի ակցիաներ էին իրականացնում գյուղապետարանի ու մարզպետարանի մոտ՝ պահանջելով գործող գյուղապետ Ռաֆիկ Անդրեասյանի հրաժարականը: Բանը հասավ նրան, որ համայնք գնաց ՊՎԾ լիազորությունները դադարեցված պետ Դավիթ Սանասարյանը, ապա նաև Արարատի մարզպետ Գարիկ Սարգսյանը ևս գյուղապետին կոչ էր արել հրաժարական տալ։ Հոկտեմբերի 10-ին նա հրաժարականի դիմում էր ներկայացրել, բայց 4 ամիս անց նա կրկին վերընտրվեց համայնքապետ:
Սերժ Սարգսյանին աջակցելու էր եկել նաև Նորաշենի նախկին համայնքապետը, որը կրկին ցանկանում է հետ վերադառնալ այդ պաշտոնին: