ԱՄՆ-ն խստացրել է Ռուսաստանի նկատմամբ արտահանման ռեժիմը, հաղորդում է ՌԻԱ Նովոստին՝ հղում անելով ԱՄՆ առևտրի նախարարության տեղեկացմանը։
Փոփոխությունները կվերաբերեն հրթիռային տեխնոլոգիաների, ինչպես նաև միջուկային չտարածման, կենսաբանական և քիմիական զենքի հետ կապ ունեցող արտադրանքի արտահանմանն ու վերաարտահանմանը, ասվում է փաստաթղթի տեքստում։ Մասնավորապես, կսահմանափակվի այն ապրանքների արտահանումն ու վերաարտահանումը, որոնք կարող են կիրառվել հրթիռային համակարգերի մշակման, արտադրության և օգտագործման համար։
Նոր օրենքների համաձայն, ամերիկյան արտահանողները պետք է լիցենզիա ստանան նման արտադրանքի որոշ տեսակների համար։ Ընդ որում, տվյալ լիցենզիաները ստանալու հայտերը կդիտարկվեն ելնելով «մերժման կանխավարկածից»։
Նման մոտեցումը բացատրվում է Ռուսաստանի կողմից «Նովիչոկ» նյութի օգտագործման նկատմամբ ԱՄՆ-ի լուրջ վերաբերմունքով, ինչպես նաև լիցենզիաներ տալուց առաջ ստուգումների հարցերում Ռուսաստանի «անբավարար համագործակցությամբ»։
Փոփոխությունները ուժի մեջ կմտնեն 2020 թվականի փետրվարի 24-ից։
