Քրդական Fırat լրատվական գործակալության փոխանցմամբ՝ ԵՄ ընդլայնման և եվրոպական հարևանության հարցերով եվրակոմիսար Շտեֆան Ֆյուլեն անդրադարձել է Թուրքիայում կրոնական ազատությունների խնդրին.
«Թուրքիայում մուսուլման չհանդիսացող կրոնական համայնքները բախվում են մի շարք խնդիրների, Թուրքիան պետք է երաշխավորի կրոնական ազատությունները։ Միջնակարգ դպրոցներում շարունակում են պարտադիր մնալ կրոնական մշակույթի ու էթիկայի դասերը։ Միսիոներներն ընկալվում են որպես տարածքային ամբողջականության ու մուսուլմանական կրոնին սպառնացող վտանգ։
Ալևիների ու ոչ մուսուլմանական կրոնական համայնքների հետ թուրքական կառավարության սկսած երկխոսությունը դեռևս որևէ կոնկրետ արդյունք չի տվել։ Թուրքիան՝ որպես ԵՄ-ին անդամակցել ցանկացող երկիր, պարտավոր է ապահովել իր բոլոր քաղաքացիների ազատ դավանանքը»։
Եվրախորհրդարանի հոլանդացի պատգամավոր Բաստիան Բելդերն իր հերթին նշել է, որ Թուրքիայի Կրոնական գործերի նախարարությունը, որի բյուջեն կազմում է 1 միլիարդ եվրո, և որն ունի 117,000 աշխատակից, թշնամական դիրքորոշում է որդեգրել մյուս կրոնների և միսիոներական գործունեության հանդեպ։
Հիշեցնենք, որ նախորդ շաբաթ Թուրքիայի կրոնական ազատությունների խնդրին անդրադարձել էր նաև ԱՄՆ պետքարտուղար Հիլարի Քլինթոնը՝ ընդգծելով, որ Թուրքիան նոր Սահմանադրության ընդունմամբ պետք է ապահովի կրոնական ազատությունները։
