«Diamond Princess» զբոսանավով ծովային ճանապարհորդություն կազմակերպած «Princess Cruises» ընկերությունը հայտարարել է, որ կարանտինում գտնվողների դրությունը հեշտացնելու համար արվում է ամեն հնարավորը։
Բրիտանացի Դևիդ Աբելը Ֆեյսբուքի իր էջում պարբերաբար պատմում է զբոսանավում տեղի ունեցող իրադարձությունների վերաբերյալ։ Նա պատմել է, որ ուղևորները պետք է պարբերաբար չափեն մարմնի ջերմաստիճանը և տեղեկացնեն բուժանձնակազմին։
Սկզբում նրանց հրահանգվել է փակվել նավախցերում, ինչը անհանգստության առիթ է տվել հատկապես այն խցերի զբոսաշրջիկներին, որտեղ բացակայել են լուսամուտները։ Սակայն այժմ թույլատրվում է դուրս գալ փոքր խմբերով, բայց անպայման հագնել դիմակներ և միմյանցից պատշաճ հեռավորություն պահպանել։
Նրանց տրամադրում են արբանյակային հեռուստատեսություն, ֆիլմեր, սեղանի խաղեր, անգլերեն և ճապոներեն թերթեր, ինչպես նաև անվճար համացանց և հեռախոսային կապ։
«Ստյուարդներն այլևս չեն գալիս օթյակներ՝ հարդարելու անկողինը կամ մաքրելու տարածքը։ Մենք պետք է ինքներս զբաղվենք հիգիենայով և օթյակների մաքրությամբ»։ «Հագուստ լվանալն անհնարին է և մենք հագնում ենք այն, ինչ հագել ենք նախորդ օրերին։ Ներքնաշորերը լվանում ենք լվացարանի մեջ, քանզի ունենք օճառ»։ «Կարանտինի առաջին օրը սնունդը քիչ էր։ Հիմա սննդի առումով խնդիր չկա, չնայած, որ ճաշացանկն ամբողջությամբ փոխվել է և այն այլևս բարձրակարգ չէ»,- պատմել են զբոսանավում գտնվող ուղևորները։
