Որակյալ կրթությունն է այն կարևոր հենքը, որի վրա կառուցվում է երկիրը, տնտեսությունը, բանակը: Այս թեմայի շուրջ «Առաջին լրատվական»-ի հետ զրույցում անդրադառնալով դիտարկմանը, որ նախկինում արտերկրում կրթություն ստանալու և հատկապես կրթաթոշակների վերաբերյալ ինֆորմացիան քչերին էր հայտնի, ARMAKAD ըկերության նախագահ Խաչիկ Գևորգյանը նշեց, որ ընկերությունն ստեղծվել է 2007-ին. «Այդ ժամանակ իրավիճակն արհավիրքային էր, ակադեմիական հայտարարությունների մենաշնորհ էր, անհատական հայեցողությամբ էին հայտարարությունները տրամադրվում, ARMAKAD ըկերության շնորհիվ այդ հայտարարությունները հասանելի դարձան շատերին, և այսօր իրավիճակը փոխվել է, համացանցը առատ է կրթական հնարավորությունների մասին ինֆորմացիայով»:
Որքա՞ն է հավանական, որ արտերկրում սովորելուց հետո կվերադառնան Հայաստան և իրենց գիտելիքները կծառայեցնեն հայրենիքին: Այս հարցին ի պատասխան՝ Խաչիկ Գևորգյանը նշեց, որ շատ օգտակար է, երբ մեր հայրենակիցները կրթություն են ստանում տարբեր երկրների լավագույն հաստատություններում. «Ուղղակի թե անուղղակի ճանապարհով այդ ամենը ի վերջո վերադառնում է Հայաստան»:
Խաչիկ Գևորգյանի կարծիքով՝ անհրաժեշտ է հիանալի ակադեմիական, գիտական պայմաններ ստեղծելու, լավ վարձատրելու քաղաքականություն վարել և թափուր տեղերը զբաղեցնելու համար Հայաստան հրավիրել աշխարհի հայտնի գիտնականների՝ ընդ որում՝ ոչ միայն հայ:
«Մի տարի է բուհերի խորհուրդները ձևավորվել են, հավաքվում են միայն նիստերին, ոչինչ չի արվում,- նկատեց մեր զրուցակիցը: Նա նաև ընդգծեց, որ բուհերի ռեկտորների պաշտոնը զբաղեցնելու համար անհրաժեշտ է միջազգային մրցույթ հայտարարել՝ պայմաններում նշելով, որ հայերենի իմացությունը պարտադիր է:
Մանրամասն՝ տեսանյութում: