Ռուսաստանի արտգործնախարարության կայքի հաղորդմամբ՝ այսօր հեռախոսազրույց են ունեցել Ռուսաստանի ու Հայաստանի արտգործնախարարներ Սերգեյ Լավրովն ու Էդվարդ Նալբանդյանը։ Հեռախոսազրույցի ժամանակ կողմերը քննարկել են Լեռնային Ղարաբաղի շուրջ տիրող իրավիճակին առնչվող տարբեր ասպեկտներ։
Կողմերը շեշտը դրել են 2010 թվականի հոկտեմբերի 27-ին Աստրախանում և 2011 թվականի մարտի 5-ին Սոչիում Ռուսաստանի, Հայաստանի ու Ադրբեջանի նախագահներ Դմիտրի Մեդվեդևի, Սերժ Սարգսյանի ու Իլհամ Ալիևի միջև տեղի ունեցած հանդիպումների ժամանակ ձեռք բերված պայմանավորվածությունների գործնական կատարման այժմեականության վրա։
Այդ պայմանավորվածություններն առնչվում էին հրադադարի ռեժիմի պահպանման, փոխադարձ հիմունքներով անվտանգության հավելյալ միջոցների ու վստահության ամրագրման, միջադեպերի հետաքննման հարցում համագործակցության անհրաժեշտությանը։
Նալբանդյանը հայտնել է, որ մոտ ապագայում ռուսական կողմը կստանա Սերժ Սարգսյանի պատասխանը՝ հունիսի 24-ին Կազանի հանդիպման արդյունքներով Մեդվեդևի հղած ուղերձին։
