Վարչապետ Նիկոլ Փաշինյանի նախաձեռնությամբ տեղի է ունեցել հեռախոսազրույց Եվրոպական խորհրդի նախագահ Շառլ Միշելի հետ։ ՀՀ վարչապետը և Եվրոպական խորհրդի նախագահը քննարկել են Հայաստան-ԵՄ հարաբերություններին վերաբերող հարցեր: Քննարկման առանցքում է եղել Հայաստանում իրականացվող ժողովրդավարական բարեփոխումների օրակարգը:
Այս և այլ հարցերի շուրջ զրույցի համար «Առաջին լրատվական»-ը հյուրընկալել է ԱԺ «Իմ քայլը» խմբակցության պատգամավոր, ԵԽԽՎ պատվիրակության անդամ Հովհաննես Իգիթյանին։
«Նախ նշեմ, որ մեր պատվիրակությունն այդ կազմով արդեն մեկ տարի է, ինչ աշխատում է ԵԽԽՎ-ում։ Այս մեկ տարվա ընթացքում մենք հնարավորություն ունեցանք նախ ցույց տալ մեր կոլեգաներին, որ մեր ներկայությունը ԵԽԽՎ-ում պատահական չէ, արհեստական չէ, և մենք այնտեղ իմիտացիա անելու համար չենք։ Մենք չենք գնում այնտեղ նրա համար, որ իբր մենք ժողովրդավար ենք, իբր մարդու իրավունքներն ենք պաշտպանում։
ԵԽԽՎ-ն աշխատում է մի քիչ այլ ձևով։ Այնտեղ պետությունները ներկա են, բայց հիմնական գործընթացը կապված է քաղաքական կուսակցությունների հետ։ Օրինակ՝ պաշտոնը քվոտայով բաժանվում է այդ քաղաքական թիմերի մեջ։ Քաղաքական խմբակցությունները կարող են հայտարարություններով հանդես գալ։ Իսկ եթե մի քիչ ավելի խոր՝ գործընթացը ձևավորելու օրակարգը․ հաջորդ նստաշրջանին ո՞ւմ հրավիրել, ո՞ր երկրի նախագահին, ո՞ր երկիրը ընդգծել, ո՞ր հարցն է հիմա կարևոր։ Դա քննարկվում է քաղաքական խմբակցությունների բյուրոյում, որի անդամ եմ նաև ես։ Այսինքն՝ այսօր Հայաստանը հնարավորություն ունի օրակարգ ձևավորելու վրա ազդել»,- «Առաջին լրատվական»-ի հետ զրույցում ասաց Հովհաննես Իգիթյանը։
Մանրամասները՝ տեսանյութում։
