Օրերս պարզ դարձավ, որ Վճռաբեկ դատարանը մերժել է «Գալա» հեռուստաընկերության վճռաբեկ բողոքը՝ ուժի մեջ թողնելով վերաքննիչ դատարանի որոշումը, որով հեռուստաընկերությանը պարտավորեցնում է ապամոնտաժել իր հեռարձակող հեռուստասարքավորումները Գյումրու հին հեռուստաաշտարակի վրայից:
Հեռուստաընկերության սեփականատեր Վահան Խաչատրյանի խոսքերով՝ որոշումը քաղաքական է, այլապես երեքուկես տարի «քնած» գործը ինչո՞ւ պետք է ընտրությունների նախաշեմին արթնանար և ապամոնտաժման լուծում ստանար:
Վահան Խաչատրյանը ասել է, որ մոտ չորս տարի առաջ Գյումրու քաղաքապետարանը առաջին ատյանին դիմել էր աշտարակի վրայից «Գալա» հեռուստաընկերության սարքավորումները ապամոնտաժելու հայցով, որից հետո ընկերությունը հակընդդեմ հայց է ներկայացնել: «Մեկ անգամ գնաց վերաքննիչ, հետո Վճռաբեկը ընտրություններից հետո բեկանեց վերքննիչի որոշումը, դրանից հետո ուղարկեց նորից առաջին ատյան: Առաջին ատյանից երեք տարի քնած գործը եկել հասել է Վճռաբեկ: Առաջին ատյանը որոշեց, որ մենք պետք է ապամոնտաժենք մեր սարքավորումները, վերաքննիչը թողեց ուժի մեջ, մենք դիմեցինք Վճռաբեկ, Վճռաբեկն էլ վարույթ չընդունեց՝ ուժի մեջ թողնելով վերաքննիչի որոշումը»,- ավելացրել է Վահան Խաչատրյանը:
Դեռ այն ժամանակ ընկերությունը դիմել էր կենտրոնական հեռուստաաշտարակ և մերժում ստացել, որ տեղ չկա դնելու: Հիմա նորից են դիմել և ստացել պատասխան, որ սարքավորումների համար գտնվել է տեղ՝ 144 մետր բարձրության նիշի վրա կարող ենք տեղադրել ալեհավաքը, ինչի համար հավելյալ սարքավորումներ են անհրաժեշտ:
Հարցին՝ այս պահին Գալան ի վիճակի՞ է հավելյալ սարքավորումներ ձեռք բերել, Վահան Խաչատրյանը պատասխանել է. «Ի վիճակի է, ավելին՝ երեք տարի առաջ նրանք մի անհեթեթ նամակ էին գրել, որ մեզ պետք են այլ սարքավորումներ, որոնք հեռուստաաշտարակին կհամապատասխանեն: Ես պարտավորվեցի՝ եթե ասեն՝ ինչ սարքավորումներ են պետք, ապա կարճ ժամկետում կներկրեմ այդ սարքավորումները և կտեղադրեմ»: Նա նաև նշել է, որ այժմ այդ սարքավորումները ձեռք բերելու գործընթացի մեջ են, որպեսզի ազդանշանը հասցնենք մինչև մյուս հեռուստաաշտարակ և մալուխ, որոնք կապահովեն ալեհավաքն այդ բարձության վրա տեղադրելը:
