Ռոբերտ Քոչարյանը հրապարակել է իր հերթական հարցազրույցը, որը անդրադարձ է ներքին իրողություններին, տնտեսական և քաղաքական իրադրությանը, և որում նա կրկնում է իր «կոնսենսուս մինուս մեկ» բանաձևը և արձանագրում, որ այն կայացել է:
Երկրորդ նախագահի հարցազրույցը հատկանշական է ներքին ընթացիկ իրողությունների ֆոնին, հատկապես երկու իրողության: Բավականին ինտենսիվ սրություն ստացավ ՍԴ հարցը Հրայր Թովմասյանի շուրջը, որում նաև ներգրավվեց Արթուր Վանեցյանը: Վարչապետ Փաշինյանը Եռաբլուրում հայտարարեց «շուտով հանգուցալուծման» մասին: Դրան զուգահեռ, նախօրեին տեղի ունեցավ ոստիկանության հատուկ գործողությունը իշխող նախկին համակարգի շրջանակում գործող մի խումբ երիտասարդների հանդեպ: Ի դեպ, այստեղ հետաքրքիր է մի հանգամանք՝ նրանց շարքում է նաև «Ադեկվադ» կուսակցության առաջնորդը, որը հայտարարել էր այն մասին, թե Միքայել Մինասյանն է ընդդիմությունը միավորելու միակ պատրաստված թեկնածուն: Այդ հայտարարությանը, ի դեպ, անմիջապես հաջորդել էր երկրորդ նախագահի գրասենյակի արձագանքը, որ վաղ է խոսել այդպիսի թեկնածուների մասին:
Ինչո՞վ է հիշարժան այդ հանգամանքը: Նրանով, որ Ռոբերտ Քոչարյանն իր նոր հարցազրույցում գործնականում առաջին անգամ աննախադեպ բաց հայտարարում է նոր իշխանության դեմ ընդդիմությանն առաջնորդելու հավակնության մասին, և այդ մասին նրա բնորոշումները ակնարկում են, որ նա իրեն դիտարկում է այդ հարցում գործնականորեն մրցակցությունից դուրս կամ էական առավելություն ունեցող: Երկրորդ նախագահն ակնհայտորեն շտապել է դուրս չմնալ նախկին իշխող համակարգի միջև առկա մրցակցությունից, որի առանցքում անշուշտ ընդդիմադիր գործընթացի լոկոմոտիվի, առաջնորդի կամ դրոշակակրի համար պայքարն է: Այդ առումով է հատկանշական, որ երկրորդ նախագահն իր մասին հիշեցնում է այլ ուղղություններով իշխանություն-նախկին իշխանություն դիմակայության թեժացման ֆոնին՝ ըստ ամենայնի կանխազգալով խաղից դուրս մնալու կամ ուշանալու վտանգ:
Ընդ որում, հնարավոր է, որ հարցազրույցը գործնականում ակնարկ է հենց ավելի շատ նախկին իշխանության տարբեր խմբերին, որ չի ստացվի իրեն խաղից դուրս թողնել՝ օգտվելով ազատազրկված լինելու հանգամանքից: Ինչ կարձագանքեն Ռոբերտ Քոչարյանին:
Լուսանկարը՝ Armeniasputnik-ի
