Այսօր ՀՀ ԱԺ պատգամավոր, «Ժառանգություն» խմբակցության անդամ Արմեն Մարտիրոսյանը և «Ժառանգություն» կուսակցության անդամ, փաստաբանների պալատի անդամ Արշալույս Նիկողոսյանը լրագրողների հետ հանդիպմանը մասնավորապես խոսեցին ԿԸՀ ընտրությունների մասին:
Արմեն Մարտիրոսյանի խոսքով՝ որքան էլ «Ժառանգությունը» պայքարեց ընտրական հանձնաժողովների դեմ, իշխանություններն օգտագործեցին փրկօղակը, այն է՝ ՀԱԿ-ի առաջարկը: «Գարեգին Ազարյանի ընտրությունը ամեն ինչի մասին վկայում էր: Դատարանը ևս մեկ անգամ ապացուցեց, որ կես գրամ անկախություն չունի, և Հայաստանում որևէ անկախ մարմնի մասին խոսելը հեքիաթ է»,- նշեց Մարտիրոսյանը՝ ավելացնելով, որ այսօր ունենք այն, ինչ ունենք: Որ իշխանությունները պատրաստ չեն անկախ ընտրությունների՝ ապացուցում է «Ա1+»-ին և Գյումրիի «Գալա» հեռուստաընկերությանը եթերից զրկելու փաստը, ընտրությանը մասնակցած մարդկանց ցուցակները չհրապարակելը:
«Իշխանությունը պատրաստ չէ, քաղաքական կամք չունի ազատ, արդար ընտրություններ անցկացնելու: Գարեգին Ազարյանի ընտրությունը դա ապացուցեց: Կարծում եմ, այդ բացասական աշխատանքի տենդենցը հաղթեց»,- ասաց «Ժառանգության» պատգամավորը: Նրա խոսքով, եղել են բազմաթիվ ընտրակեղծիքներ, կաշառք բաժանելու դեպքեր, և ԿԸՀ նախագահը ոչ մի անգամ չի արձագանքել դրանց: «Ցավոք, միջազգային կառույցները օգնեցին իշխանություններին»,- ասաց Ա. Մարտիրոսյանը:Նա ընդդիմադիրներին համագործակցության կոչ արեց՝ պայքարելու ընտրակեղծիքների դեմ:
Անդրադառնալով ՀԱԿ-իշխանություն երկխոսությանը՝ Ա. Մարտիրոսյանը նշեց, որ գումարելիների տեղերը փոխելուց գումարը չի փոխվի, քանի որ անհրաժեշտ է համակարգված փոփոխություն, պետք է նոր սահմանադրություն, օրենքներ ընդունել: «Դրանից ոչինչ չի փոխվի, քանի որ ամբողջ հասարակությունը պետք է համագործակցի: Համագործակցությունը պետք է լինի մարդու իրավունքների պաշտպանության և այլ հարցերի շուրջը»:
