Այսօր՝ հունվարի 23-ին, Ազգային ժողովում շարունակվում է հերթական նիստի աշխատանքը: Այժմ քննարկվում է ՏԻՄ-ի մասին օրենքում փոփոխություններ կատարելու մասին օրենքի նախագիծը 2-րդ ընթերցմամբ ընդունելու մասին հարցը:
ԱԺ փոխնախագահ Լենա Նազարյանը նշեց, որ օրենքի նախագծի մասին ասելիք չունի, խոսեց հետհեղափոխական երկրի ընդդիմության ինստիտուտի մասին. «Լավ ընդդիմության կարիք ունենք: Պարոն Մարուքյանը ջանք չի խնայում բացատրելու, թե ինչ է ընդդիմությունը, որն է ընդդիմության դերը: Ցավով եմ նշում, որ անգամ «Լուսավոր Հայաստան»-ը ուղղակի խցանվել է անցյալում: Այն անցյալ համակարգին բնորոշ ընդդիմություն է ներկայանում իր մոտեցումներով, բառապաշարով, մտածելակերպով ու վախերով»:
Դիմելով «Լուսավոր Հայաստան» խմբակցության ղեկավար Էդմոն Մարուքյանին՝ Լենա Նազարյանն ասաց. «Ցավոք, ձեր ընդդիմադիրությունը դասական է ոչ թե ժողովրդավարությանը բնորոշ լինելու իմաստով, այլ դասական է հին Հայաստանի ընդդիմությանը բնորոշ լինելու իմաստով: Դուք կրկնում եք «Ելք» դաշինքը, մինչդեռ պետք է ելք գտնեք անցյալի ձևերից: Հրաժարվե՛ք անցյալից: Մարդիկ անցյալում թողեցին ոչ միայն իշխանությունը, այլև նախորդ ընդդիմությունը: Ոչ միշտ է ճիշտ լինել կլասիկ»:
Վերջում նա հավելեց. «Ամենայն հարգանքով, հարգելի գործընկերներ»:
Մանրամասները՝ տեսանյութում:
