«Այսուհետ ՀԱԿ-ից կարող ենք հանել արմատական բառը». այս մասին այսօր հրավիրված մամուլի ասուլիսի ընթացքում, անդրադառնալով ՀԱԿ-կոալիցիա երկխոսությանը, հայտարարեց Ժողովրդական կուսակցության նախագահ Տիգրան Կարապետյանը: Նա նաև դեմ է Հայաստանում գործող բոլոր ընդդիմադիրներին ՀԱԿ-ին վերագրելուն, քանի որ ՀՀ քաղաքական դաշտում կան խորհրդարանական և արտախորհրդարանական ուժեր, որ Կոնգրեսի հետ չեն:
Ավելին՝ նա համոզված է, որ այս երկխոսությունը թիմային և քաղաքական շահեր է հետապնդում: Իսկ շահեր ասելով՝ նկատի ունի առաջիկա խորհրդարանի և կառավարման ձևավորումը: Այսինքն՝ նոր ձևաչափ նոր խաղացողով՝ ի դեմս ՀԱԿ-ի: «Արթուր Բաղդասարյանին ԱԽՔ ու վախք էին ասում: Հիմա մի պիտակ էլ իրենց թող կպցնեն ու շարունակեն իրենց երկխոսությունը»,- առաջարկեց Տիգրան Կարապետյանը:
Իսկ թե ինչու իշխանությունը գնաց երկխոսության՝ Տիգրան Կարապետյանի դիտարկմամբ, ՀԱԿ-ի շուրջը միավորվել էին նախկին չինովնիկներն ու օլիգարխները, հետևաբար կարողացան մտահոգել իշխանությանը: Իշխանությունները նախընտրեցին նրանց այդ ամբիոնը տանել խորհրդարան, քան թողնել փողոցում:
Տիգրան Կարապետյան արտահերթ ընտրություններին չի հավատում այն պատճառաբանությամբ, որ նախ՝ ժամանակն է քիչ, իսկ հետո էլ՝ ասենք, արտահերթ ընտրություններ լինեն, նույն Ազարյա՞նը չի ղեկավարելու ԿԸՀ-ն, նույն իր նախկին մեկնաբանություննե՞րը չի հնչեցնելու: Նրա խոսքերով, համակարգն է պետք փոխել, բայց ոչ ՀԱԿ-ի միջոցով: «ՀԱԿ-ում կան նաև նորմալ մարդիկ, բայց քչացել են: ՀԱԿ-ը հիմնականում չինովնիկների կառույց է: Ո՞ւմ պետք է հավատան՝ նախկին բերդի պետի՞ն, հարկայինի պետի՞ն, թե՞ քաղաքապետին»,- լրացրեց Տիգրան Կարապետյանը:
Ժողովրդական կուսակցության նախագահը նաև ընդգծեց, որ Լևոն Տեր-Պետրոսյանն ու Սերժ Սարգսյանը իրենցից դուրս ոչ մի դաշտ չեն պատկերացնում:
Ինչ վերբերում է նոր դաշինքին՝ Տիգրան Կարապետյանը հավատացրեց, որ դաշինքի կգնան այն ուժերի հետ, ովքեր սկզբունքային ու արմատական են: Եվ հիշեցրեց, որ իրենք պատրաստ են եղել նաև ՀԱԿ-ի հետ դաշինք կազմել, այնինչ, ըստ նրա, ՀԱԿ-ը արդեն արմատական իր դիրքերից հետ է կանգնել:
«Մենք էլ կարող էինք, չէ՞, մեր սկզբունքերից հրաժարվել՝ հեռուստաալիքը պահեինք, և այլն, և այլն, բայց չարեցինք, չէ՞: Կամ որ բոլորը ասում են՝ հանուն հայրենիքի ենք երկխոսության գնում: Այնինչ, ժողովուրդը հիասթափվում է, իսկ ժողովրդին հիասթափությունից հանելը շատ դժվար է: Բայց կարող եմ միանշանակորեն ասել, որ 3-րդ ուժը ժողովուրդն է»,- եզրափակեց Տիգրան Կարապետյանը: