Թուրքական Salam News գործակալությունը, վկայակոչելով պաղեստինյան «Մաան» լրատվական գործակալությանը, հայտնում է, որ Թուրքիայի վարչապետ Ռեջեփ Թայյիփ Էրդողանը դիմել է Եգիպտոսի ռազմական խորհրդին՝ հուլիսի 25-ին Գազայի հատված այցելելու համար։ Եգիպտական կողմը դրական պատասխան է տվել։
Նշվում է, որ Իսրայելը Թուրքիայի այս քայլը որակում է որպես «ՀԱՄԱՍ» շարժմանն ուղղված աջակցություն։ Իսրայելական կողմը մի շարք քայլեր է ձեռնարկել՝ Էրդողանի այդ այցը կանխելու համար, սակայն դրանք ապարդյուն են անցել։ Եգիպտական կողմը մնացել է անդրդվելի։
Միևնույն ժամանակ Գազայի հատվածի պաշտոնատար անձինք հայտարարել են, որ իրենք իրազեկված չեն այդ այցի մասին։ Գազայում «ՀԱՄԱՍ»-ի ներկայացուցիչը հայտարարել է, որ իրեն ոչ ոք պաշտոնապես չի հայտնել Էրդողանի այցի մասին։
Հիշեցնենք, որ Էրդողանը բազմիցս քննադատել է Գազայի հատվածի նկատմամբ իսրայելական կողմի գործողությունները՝ նրան մեղադրելով պետական մակարդակի ահաբեկչության կատարման և ծովահենությամբ զբաղվելու մեջ։
