Մարտի 1-ի տուժածներն ահազանգում են անարդարության մասին: Նրանք պնդում են, որ չեն կարողանում վերականգնել տուժողի կարգավիճակը, ձգձգվում են դատաբժշկական տարբեր փորձաքննություններ, և մեղադրում են Հատուկ քննչական ծառայությանը: Թեմայի շուրջ զրուցելու համար «Առաջին լրատվական»-ը հյուրընկալել է իրավապաշտպան Վարդան Հարությունյանին:
Մեր զրուցակցի խոսքով՝ Մարտի 1-ի դեպքերի ժամանակ հսկայական քանակությամբ տուժածներ կային, որոնց մի մասը հայտնվեց հիվանդանոցներում, մի մասը՝ ոչ, որովհետև հիվանդանոց գնալն ինքնին արդեն վտանգավոր էր: «Վիրավորված լինելու հանգամանքը նրանք դիտարկում էին որպես ընդդիմության հավաքներին մասնակցելու փաստ, իսկ այդ փաստն ինքնին արդեն այդ ժամանակ դատապարտելի էր: Շատերի վնասվածքներն էլ բժիշկները ներկայացրել են շատ ավելի թեթև, քան իրականում դրանք եղել են: Եվ այսքան տարիներ անց քննչական ծառայությունները ինչպե՞ս կարող են վերականգնել այդ իրականությունը. իրական պատկերի վերականգնումը մի քիչ բարդ է լինելու, թեև իհարկե կան այդ ճանապարհները»,- ասաց նա՝ հավելելով, որ ինքը միաժամանակ հասկանում է տուժածների բողոքները:
Անդրադառնալով Ռոբերտ Քոչարյանի գործին՝ Վարդան Հարությունյանը նշեց. «Փաստաբաններն իրավունք ունեն բողոքներ ներկայացնելու, անելու այն ամենը, ինչ անում են այսօր, բայց որքանո՞վ է ընդունելի այդ իրավունքի չարաշահումը, որքանո՞վ է տեղավորվում իրավաբանության շրջանակներում: Սա փակուղի է»:
Իրավապաշտպանը ակնհայտ է համարում, որ այս քրեական գործով փաստաբանները և մեղադրյալները իրենց հույսը կապում են Սահմանադրական դատարան կոչվող կառույցի հետ. «Եվ այդ Սահմանադրական դատարանը չի էլ թաքցնում, որ ապրում է, կա, գոյություն ունի միայն այդ գործի համար»: Նա հավելեց, որ երկու տարին քիչ ժամանակ չէր՝ լուծելու ՍԴ հարցը. «Այսօր արդեն գործ ունենք մեր թերացման հետ»:
Վարդան Հարությունյանի կարծիքով՝ Քոչարյանի գործով ՍԴ ցանկացած որոշում չի կարող կիրառելի լինել դատարանի համար. «Նրանք Սահմանադրական դատարան չեն, հատկապես ՍԴ նախագահը մենք գիտենք, թե ինչ զարտուղի ճանապարհներով է հասել այդ դիրքին, և այդ ճանապարհն ինքնին արդեն կասկածի տակ է դնում այդ դատարանի լեգիտիմությունը, լիազորությունները: Վահե Գրիգորյանը ժամանակին բավականին հստակ և մատչելի ներկայացրել է այդ ամենը: Ես չեմ կարծում, որ մեր ամբողջ երկիրը կարող է լինել այդ Սահմանադրական դատարան կոչվածի գերին. դա բացառվում է»:
Հարցազրույցն ամբողջությամբ՝ տեսանյութում: