Սերխիո Մարգարյանի գլխավորած Պերուի հավաքականը լրացուցիչ ժամանակում երկու անպատասխան գնդակ ուղարկեց Կոլումբիայի ընտրանու դարպասն ու դուրս եկավ Ամերիկայի գավաթի կիսաեզրափակիչ:
Եթե առաջին խաղակեսն անցավ կոլումբիացիների առավելությամբ, չնայած առանց լուրջ գոլային պահերի, ապա երկրորդ խաղակեսում ամբողջությամբ հավասար խաղ էր ընթանում և երկու թիմերն էլ հաշիվը բացելու իրական հնարավորություններ ունեին: Ամենավտանգավոր պահն, այնուամենայնիվ, ստեղծվեց պերուացիների դարպասի մոտ. 66-րդ րոպեին հանրահայտ Ֆալկաոն շեղ հարվածեց 11-մետրանոց նշակետից: Հիմնական ժամանակում թիմերն այդպես էլ չկարողացան բացել հանդիպման հաշիվը:
Ճակատագրական եղավ 102-րդ րոպեն. կոլումբիացիների դարպասապահ Լուիս Մարտինեսի և պաշտպանների անհամաձայնությունից օգտվեց Լոբատոնը, իսկ 10 րոպե անց հանդիպման վերջակետը դրեց Վարգասը, և կրկին մանկական սխալ գործեցին մրցակցի պաշտպաններն ու դարպասապահը:
Կոլումբիա-Պերու` 0:2: Սերխիո Մարգարյանի Պերուի հավաքականը կիսաեզրափակիչում է, որտեղ կհանդիպի Արգենտինային մրցաշարից դուրս թողած Ուրուգվայի ընտրանու հետ:
