Նախորդ տարվա ընթացքում մշակույթի ոլորտում աղմկահարույց իրադարձություններ տեղի ունեցան: Աղմուկ բարձրացավ նաև այն նախագծի շուրջ, որի համաձայն՝ Ազգային գրապալատի երրորդ հարկը նախատեսված է տրամադրել Մնջախաղի պետական թատրոնին: Մի շարք արվեստագետներ, ճարտարագետներ, մտավորականներ դեմ են այս նախագծին: Մշակույթի նախարարի նախկին պաշտոնակատար Նազենի Ղարիբյանն «Առաջին լրատվական»-ի հետ զրույցում նշեց, որ այդ առնչությամբ կա երկու խնդիր. «Առաջին՝ այդ շենքը հուշարձան է, և այդ նախագծով այնտեղ որևէ փոփոխություն հնարավոր չէ անել. այս նախագիծը ամբողջությամբ հակասում է Հուշարձանների պահպանության օրենքին, և երկրորդ՝ այս նախագծով նաև շենքի նոր մուտք բացելու խնդիր կա, որը քաղաքաշինական խնդիր է առաջացնում»:
Անդրադառնալով դիտարկմանը, որ մշակույթի նախկին փոխնախարար Տիգրան Գալստանը «Առաջին լրատվական»-ի հետ զրույցում կարծիք էր հայտնել, որ մշակույթի ոլորտում իշխանության են եկել հակահեղափոխականներ, Նազենի Ղարիբյանը նշեց. «Մշակույթի նախարարության անձնակազմում հեղափոխականներ չեն: Ես հեղափոխական եմ, ես այդպիսին ծնվել եմ»:
Ինչ վերաբերում է այն իրողությանը, որ Նազենի Ղարիբյանի պաշտոնավարման օրոք նրա հեղափոխական գաղափարները սվիններով ընդունվեցին, մեր զրուցակիցը նշեց, որ դա օրինաչափ էր. «Հեղափոխական, անգամ առաջադեմ կամ բարենորոգչական գաղափարները այդպես են ընդունվում»:
Նազենի Ղարիբյանը նաև ընդգծեց, որ համաձայն է վարչապետի այն կարծիքի հետ, թե պետական համակարգում կա դիմադրություն:
Մանրամասն՝ տեսանյութում: