Գուցե համաձայնեմ տեսակետին, որ որոշ առումով իշխանությունը դանդաղում է որոշ հանգամանքներում, բայց պետք է նաև հասկանանք, որ Հայաստանը 2020 թվականի բյուջեով շատ մեծ ուշադրություն է դարձնելու կրթությանը, առողջապահությանը, ենթակառուցվածքների ստեղծմանը և այս ամենն է բերելու և՛ տնտեսական զարգացմանը, և՛ քաղաքացու արժևորմանը: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Սոս Ավետիսյանը՝ ամփոփելով 2019 թվականը:
«Ես հասկանում եմ, որ պահանջները շատ են, մարդիկ խստություն են ուզում, բիրտ քայլեր են ուզում, բայց սա չէ այն ճանապարհը, որովհետև հեղափոխության օրակարգը, որն ազնիվ օրակարգ է, և պետական ապարատի ժառանգական էֆեկտները և դրանով մեկտեղ տարբեր աշխարհաքաղաքական զարգացումները բերել մի տրամաբանության մեջ, որոշակի ժամանակ է պահանջում: Ես որոշակի առումով մեր քաղաքացիների ներողամտությունն եմ հայցում որոշ հարցերի շուրջ, բայց ես նաև լավ եմ հասկանում, որ մեր քաղաքացիները շատ լավ հասկանում են, թե ՀՀ-ում ինչ է տեղի ունենում»,-ընդգծեց «Իմ քայլի» պատգամավորը՝ հավելելով, որ հասարակությունը ի թիվս այլ խնդիրների, տեսնում է, որ այս իշխանությունը չի կոռումպացվում:
