ԱՄՆ նախագահ Դոնալդ Թրամփը հրաման է արձակել իրանցի գեներալ Ղասեմ Սուլեյմանիին չեզոքացնելու վերաբերյալ՝ ի հեճուկս Պենտագոնի և ամերիկյան հետախուզության վերջին տվյալների: Այս մասին հաղորդում է The New York Times թերթը՝ վկայակոչելով նախագահի վարչակազմի աղբյուրներին:
ԶԼՄ-ների տվյալներով՝ դեռևս դեկտեմբերի 28-ին ԱՄՆ նախագահը հրաժարվել է Սուլեյմանիի ուղիղ ոչնչացումից՝ հրամայելով դրա փոխարեն դեկտեմբերի 30-ին թռիչք իրականացնել «Քաթաիբ Հըզբոլլահ» շիական խմբավորման ճամբարի վրա Էլ Քաիմ քաղաքում՝ Սիրիայի հետ Իրաքի սահմանին:
Հստակեցվում է, որ այդ որոշման հետևանքով 50 մարդ վիրավորվել է, ևս 25-ը՝ զոհվել: Դա առաջացրել է բողոքի ակցիաներ Բաղդադում ԱՄՆ դեսպանատան մոտ:
Նշվում է, որ հենց այդ օրը՝ դեկտեմբերի 30-ին, հետախուզության տվյալներով, Մերձավոր Արևելքի տարածքում որևէ լուրջ բան տեղի չի ունեցել: Հետախուզությունը նաև հանգել է այն եզրակացության, որ ամերիկյան դեսպանատան մոտ բողոքի ակցիաները սպասելի էին:
Սուլեյմանիին ոչնչացնելու Թրամփի այդպիսի արմատական որոշումը առաջացրել է Պենտագոնի ներկայացուցիչների զարմանքը: Աղբյուրի խոսքով՝ ԱՄՆ ներկայացուցիչների նեղ շրջանում այդ հարցը քննարկելիս կոշտ որոշման կողմնակից էին նաև ԱՄՆ պետքարտուղար Մայք Պոմպեոն և փոխնախագահ Մայքլ Փենսը:
