ԱՄՆ նախագահ Դոնալդ Թրամփը իրանցի գեներալ Քասեմ Սուլեյմանիի սպանության որոշումը կայացրել է դեկտեմբերի 27-ին Իրաքում ամերիկյան ռազմակայանի հրթիռակոծությունից հետո, ինչի արդյունքում զոհվել է մեկ մարդ: Հարձակումից անմիջապես հետո Թրամփը հրամայել է Սուլեյմանիի վրա հարձակում պլանավորել: Այս մասին Bloomberg-ին պատմել են հանգամանքներին ծանոթ աղբյուրներ:
Ամերիկյան առաջնորդի համար կարմիր գիծը հատվել է, քանի որ մինչ այդ Սպիտակ տունը Ֆրանսիային և այլ դաշնակիցներին խնդրել էր նախազգուշացնել իրանցիներին, որպեսզի չհարձակվեն ամերիկացիների վրա, Bloomberg-ին պատմել է զրուցակիցներից մեկը:
Politico-ի տեղեկություններով, շաբաթվա սկզբին Թրամփը Ֆլորիդայի իր Մար-ա-Լարգո նստավայրում հանդիպումներ է անցկացրել պետքարտուղար Մայք Պոմպեոյի, ԱՄՆ բանակի գեներալ Մարկ Միլիի, ազգային անվտանգության հարցերով խորհրդական Ռոբերտ Օ’Բրայենի և բարձրաստիճան այլ պաշտոնյաների հետ:
Ըստ Bloomberg-ի, վերջին մեկ շաբաթվա ընթացքում Սուլեյմանիին չեն հետևել, գեներալին սպանել են երբ հետախուզությունը հայտնել է, որ նա կլինի Բաղդադի օդանավակայանում:
