Կանադայի կառավարությունն Ուկրաինային կօգնի՝ լուծելու էներգետիկ խնդիրներն ու բարեփոխելու տնտեսությունը: Այս մասին հայտարարել է Կանադայի արտգործնախարար Ջոն Բերդը, ով այցով գտնվում է Լեհաստանում՝ փոխանցում է ITAR-TASS-ը:
«Մենք կաշխատենք մեր ուկրաինացի գործընկերների հետ էնեգետիկ կարիքներին առնչվող հարցերին լուծում գտնելու գործում և կօգնենք Ուկրաինային ձեռնարել կարևոր քայլեր, որոնք անհրաժեշտ են երկրի տնտեսության բարեփոխման համար. այն պետք է լինի թափանցիկ և հիմնված լինի շուկայական համակարգի կանոնների վրա, որպեսզի հնարավոր լինի ինտեգրել (Ուկրաինան) ԵՄ-ին»,- ասել է արտգործնախարարը:
Բացի այդ, Բերդը հայտնել է, որ Կանադան 9.2 մլն դոլար կտրամադրի Ուկրաինայում ժողովրդավարության ամրապնդման լեհ-կանադական համատեղ նախագծերի իրականացման համար: «Կանադան ուրախ է լինել Լեհաստանի գործընկերը կայունության վերականգնման և ինստիտուտների ամրապնդման նպատակով Ուկրաինային օգնություն ցուցաբերելու գործում»,- ասել է նա: Թե կոնկրետ ինչ նախագծերի մասին է խոսքը՝ չի հստակեցվում: