Երևանի ընդհանուր իրավասության դատարանում Արմեն Վարդապետյանի նախագահությամբ ավարտվել է Իլլարիոն Նունուշյանի գործի դատական քննությունը:
Դեպքի պահին Նունուշյանը 30 տարեկան էր: Նրան մեղադրանք էր առաջադրվել ՀՀ քրեական օրենսգրքի 112 հոդվածի 2-րդ մասի 14-րդ կետով՝ դիտավորությամբ տուժողի առողջությանը ծանր վնաս հասցնելը, ինչի արդյունքում տուժողը մահացել է:
Տուժողը Իլլարիոն Նունուշյանի հետ փաստացի ամուսնական հարաբերությունների մեջ գտնվող կինն էր…
Նախկինում դատապարտված և պատժի կրումից 2017 թվականի հունիսի 9-ին ազատված Իլլարիոն Նունուշյանը Երևանի ընդհանուր իրավասության դատարանի՝ 2018 թվականի դեկտեմբերի 11-ի դատավճռով մեղավոր է ճանաչվել գողության համար՝ ՀՀ քրեական օրենսգրքի 177 հոդվածի 2-րդ մասի 1-ին կետով, և դատապարտվել է 2 տարի 6 ամիս ազատազրկման:
Վերոհիշյալ դատավճռի հրապարակումից ուղիղ մեկ ամիս առաջ, երբ Նունուշյանը գողության գործով ազատության մեջ գտնվող ամբաստանյալ էր դեռ, երբ գործը դեռևս քննվում էր ընդհանուր իրավասության դատարանում, նա կատարել է ավելի ծանր հանցավոր արարք՝ դաժան բռնություն գործադրելով՝ ոտնձգել է իր հետ փաստական ամուսնական հարաբերությունների մեջ գտնվող կնոջ կյանքի ու առողջության նկատմամբ:
Ըստ մեղադրանքի՝ 2018 թվականի նոյեմբերի 11-ի վաղ առավոտյան՝ ժամը 6-ն անց 30-ի սահմաններում, Իլլարիոն Նունուշյանը, գտնվելով ալկոհոլ օգտագործած վիճակում, Երևանի Արին Բերդի փողոցի տներից մեկում վիճաբանել է իր հետ փաստական ամուսնական հարաբերությունների մեջ գտնվող Քրիստինե Ի.-ի հետ:
Իլլարիոնը, ըստ մեղադրանքի, շուրջ 10 րոպե ձեռքերով, ոտքերով, մետաղե ամրանով ու մետաղե թեյնիկով բազմաթիվ հարվածներ է հասցրել Քրիստինեի գլխին, դեմքի, որովայնի, մեջքի շրջաններին, կնոջ առողջությանը պատճառել է ծանր վնաս՝ սալջարդ վերքերի, արյունազեղումների, քթոսկրերի կոտրվածքների, գլխուղեղի ծանր աստիճանի սալջարդի, ձախ կիսագնդի սուբդուրալ արյունահավաքի, զույգ կիսագնդերի քունքագագաթային և ուղեղիկի շրջանների սուբարախնոիդալ արյունազեղումների, որովայնամզի արյունազեղումների, փայծաղի, լյարդի պատռվածքների ձևով, որոնք ուղեկցվել են ներքին արյունահոսությամբ, գլխուղեղի այտուցով, ներքին օրգանների դիստրոֆիկ-նևրոտիկ փոփոխություններով…
Ստացած վնասվածքներից Քրիստինե Ի.-ն հաջորդ օրը՝ 2018 թվականի նոյեմբերի 12-ին, ժամը 22-ին հիվանդանոցում մահացել է:
Առաջադրված մեղադրանքում Իլլարիոն Նունուշյանն իրեն լիովին մեղավոր է ճանաչել:
Տուժողի իրավահաջորդ Վ. Ի.-ն դատարանին հասցեագրված դիմումում նշել էր, թե 82 տարեկան է, վատառողջ, չի կարող ներկայանալ դատարան, խնդրում է հիմք ընդունել իր նախաքննական ցուցմունքները, քաղաքացիական հայցի պահանջ չի ներկայացնում, պատժի նշանակման հարցն էլ թողնում է դատարանի հայեցողությանը:
Մեղադրող դատախազ Գ. Աղասյանն առարկել է գործի քննության արագացված կարգի կիրառման դեմ, բայց դատարանն արձանագրել է, որ առարկությունը փաստարկված չէ:
Դատարանը հաշվի է առել, որ Իլլարիոն Նունուշյանն իրեն լիովին մեղավոր է ճանաչել, զղջացել է, նրա խնամքին են երկու անչափահաս երեխաները, որոնցից մեկը՝ մինչև 14 տարեկան: Դատահոգեբուժական-դատահոգեբանական համալիր փորձաքննության եզրակացությամբ Իլլարիոն Նունուշյանի մոտ որոշակի խնդիրներ են արձանագրվել՝ բարդացված կենցաղային հարբեցողությամբ:
Դատարանն արձանագրել է հանցագործությունների կատարման ռեցիդիվ Իլլարիոն Նունուշյանի կողմից, այդ հանգամանքը դիտել է որպես պատասխանատվությունն ու պատիժը ծանրացնող հանգամանք:
Իլլարիոն Նունուշյանը մեղավոր է ճանաչվել ՀՀ քրեական օրենսգրքի 112 հոդվածի 2-րդ մասի 14-րդ կետով և դատապարտվել է 7 տարի ազատազրկման:
Այս պատժին գումարվել է նախորդ պատժի՝ 2 տարի 6 ամիս ազատազրկման 1 տարին, վերջնական պատիժ է սահմանվել 8 տարի ազատազրկումը:
Պատժի սկիզբը՝ 2018 թվականի նոյեմբերի 13-ից:
