2019 թվականին մեղադրյալի աթոռին հայտնված բարձրաստիճան նախկին պաշտոնյաների ցանկն անցնում է երկու տասնյակը։Երկրի թիվ մեկ մեղադրյալի տիտղոսը ստացած Հայաստանի 2-րդ նախագահ Ռոբերտ Քոչարյանը մեղադրվում է Մարտի 1-ի գործով Սահմանադրական կարգը տապալելու մեջ, ավելի ուշ Քոչարյանի մեղադրանքը լրացվել է առանձնապես խոշոր չափերի կաշառք ստանալու հոդվածով։ Թեև երկրորդ նախագահին մեղադրանքն առաջադրվել է 2018 թվականին, սակայն գործով դատավարությունը հայաստանյան լրատվամիջոցների ու հանրության համար այս տարվա ամենասպասվածն ու ամենից ինտրիգայինն էր։
Մեկ տարուց ավելի է՝ տարբեր ատյաններում Քոչարյանի պաշտպանները փորձում են ամեն ինչ անել՝ իրենց պաշտպանյալին ազատ արձակելու համար, բայց երկրորդ նախագահին ճաղերը չեն ուզում լքել։ 2020-ը այս գործով դատավարության համար կարող է և բեկումնային լինել․ ամենայն հավանականության նոր տարվա առաջին ամիսներին ՍԴ-ն կստանա Քոչարյանի գործով ՄԻԵԴ-ի ու Վենետիկի հանձնաժողովի խորհրդատվական կարծիքը։
Ի տարբերություն Հայաստանի 2-րդ նախագահի՝ 3-րդ նախագահ Սերժ Սարգսյանի մեղադրանքն ամենևին էլ Մարտի 1-ի գործով չէ։ Նա մեղադրվում է 2013 թվականի մոտ կես միլիարդ դրամի հափշտակությունը կազմակերպելու համար։ Սարգսյանը ճաղերի ետևում չէ, ստորագրություն է տվել չհեռանալու մասին ու կրկին անցել «լռության» ռեժիմի, փոխարենը խոսափողն ակտիվորեն ծածանում են հանրապետական երբեմնի կարկառունները։