Մամուլում տեղեկություն է հայտնվել ՀՀԿ գործկոմի նիստի մանրամասներից: Կուսակցությունը գործկոմի նիստ էր արել օրերս՝ ամփոփելով 2019 թվականը: Ըստ մանրամասների՝ նիստը անցել է բավականին բուռն, եղել է մարդաշատ և թերևս հույսերով լեցուն: Համենայնդեպս, տարածված տեղեկության համաձայն՝ արձանագրվել է, որ նոր իշխանության վստահությունն աստիճանաբար նվազում է, թուլանում, և այդ իմաստով պետք է աշխուժացնել աշխատանքը 2020 թվականին: Առերևույթ տրամաբանությունն այն է, որ իշխանության դիրքը թուլանում է, և ՀՀԿ-ն պատրաստվում է օգտվել դրանից՝ 2020 թվականին ավելի աշխուժացնելով իր աշխատանքը:
Օրերս սոցհարցում հրապարակվեց, որի արդյունքով՝ իշխանության դիրքի թուլացման մասին խոսելը իհարկե կլինի ինքնախաբեություն: Մյուս կողմից՝ անշուշտ ինքնախաբեության մեծ ռիսկ կարող է լինել որևէ հրապարակվող սոցհարցմանն անվերապահ վստահելը, այն էլ՝ Հայաստանում, որտեղ սոցիոլոգիան, դժբախտաբար, իր որակներով քիչ է զիջել քաղաքական համակարգին: Կամ ճիշտ կլինի ասել՝ ոչ թե սոցիոլոգիան ընդհանրապես, այլ սոցիոլոգիան որպես հանրային կյանքի մասնակից, ժամանակ առ ժամանակ քաղաքական պատկերներ մատուցող: Այդուամենայնիվ, ինչպիսին էլ լինի սոցիոլոգիական տվյալների նկատմամբ վստահության աստիճանը, առայժմ, գոնե անզեն աչքով, տեսանելի է, որ իշխանությունը հանրային վստահության ամուր դիրքում է՝ չնայած, իհարկե, գործունեության ընթացքում հարուցած բազմաթիվ հարցերով, դժգոհություններով, դիտողությունների և քննադատության առիթներով:
ՀՀԿ-ն իհարկե ունի իրավունք՝ կարծելու, որ իշխանությունը թուլանում է, վստահությունը նվազում, ըստ այդմ՝ կա դրանից օգտվելու շանս: Բայց ամբողջ հարցն այն է, որ ՀՀԿ-ն որքան աշխույժ է փորձում օգտագործել Հայաստանի ներքաղաքական կյանքում իշխանության հետ հարաբերությունում իր որևէ շանս, այդքան այդ աշխուժությունը նպաստում է իշխանության դիրքերի ամրացմանը, ոչ թե այդ դիրքերի ենթադրյալ թուլացումից ՀՀԿ շանսի ավելացմանը:
Այդ տեսանկյունից, եթե ՀՀԿ-ն արձանագրում է իշխանության թուլացում, վստահության նվազում ու եզրակացնում աշխուժանալու անհրաժեշտության մասին, ապա այստեղ խոսքը անուղղակիորեն իշխանությանն ուժեղացնելու եզրակացության մասին է: Որովհետև ՀՀԿ-ն և, իհարկե, ընդհանրապես նախկին իշխող համակարգը, գոնե առայժմ, իշխանության համար խնդիր կարող է ստեղծել իր առավել պասիվությամբ, քան աշխուժությամբ: Որովհետև այդ դեպքում իշխանությանը կզրկի մի շարք հարցերում նախկինների հավակնություններին ուղղակի թե անուղղակի հղում անելու «ալիբիից», որը քաղաքական նոր թիմը գոնե առայժմ կարողանում է օգտագործել առանց մեծ ջանքի ու հմտության և թերևս կօգտագործի նաև 2020 թվականին: Համենայնդեպս, ՀՀԿ-ն կարծես թե որոշել է ստեղծել այդ հնարավորությունը:
Լուսանկարը՝ Armeniasputnik-ի