Ճարտարապետ Միքայել Մազմանյանի նախագծած գրապալատի շենքի երրորդ հարկը նախատեսված էր տրամադրել Մնջախաղի թատրոնին, մի շարք մտավորականներ, արվեստագետներ և ճարտարապետներ դեմ են այս նախագծին: Թեմայի շուրջ «Առաջին լրատվական»-ի հետ զրույցում մշակույթի նախկին փոխնախարար Տիգրան Գալստյանը նշեց. «Արմեն Ամիրյանի պաշտոնավարման ժամանակ ներկայացվեց նախագիծ այս շենքը ձևափոխելու վերաբերյալ, այն ժամանակ մասնագիտական հասարակությունը և մշակութային ժառանգությամբ մտահոգված քաղհասարակությունը դեմ գնաց այս նախագծին և հավանաբար այդ պատճառով ընթացք չտրվեց: Հետագայում հեղափոխություն եղավ, և նախարար Լիլիթ Մակունցը որոշում կայացրեց, որ այս տարածքը չտրամադրվի Մնջախաղի թատրոնին:
Այդ շենքը հանրապետական նշանակության պատմամշակութային հուշարձան է, խորհրդային վաղ շրջանի կարևորագույն շենքերից մեկն է… Շենքի մուտքի հատվածը խնդրահարույց է՝ այգու մեջ է բացվում: Հրապարակված նախագծով ներկայացված չէ, թե այդ խնդիրն ինչպես է լուծվելու և ինչ աշխատանքներ են նախատեսվում շենքի ներսում, բայց շենքի մուտքի մոտ փակցված նախագծով նախատեսված միջամտություններն անընդունելի են: Հուշարձանի փոփոխությանը դեմ չենք, հուշարձանը պետք է հարմարեցվի ներկայիս քաղաքաշինական պահանջներին, այլապես չի կարող գոյություն ունենալ, բայց կատարվող աշխատանքներից հետո այդ հուշարձանն ավելի պետք է արժևորվի:
Խիստ տարօրինակ է, որ այս նախագիծը հատատվեց գիտամեթոդական խորհրդի կողմից: Եվ զարմացա՝ այդ խորհրդում տեսնելով Քոչարյանի պաշտոնավարման ժամանակաշրջանի մշակույթի փոխնախարարին, քանի որ դա մի ժամանակահատված էր, երբ Երևանում պատմամշակութային մի ամբողջ շերտ ջնջվեց, և հուշարձանների պահպանության ոլորտն այդ ժամանակ կոռումպացված էր… Արդեն հաստատված այս նախագծով փաստացի նախատեսված են և՛ ամրակայում, և՛ փոփոխություններ: Իրավական խախտումները թողնենք իրավաբաններին, բայց այս նախագիծը խաթարում է շենքի ճարտարապետությունը»:
«Մշակույթի ոլորտում իշխանության են եկել հակահեղափոխակնները»,- ընդգծեց մշակույթի նախկին փոխնախարարը:
Մանրամասն՝ տեսանյութում:
