ԱՊՀ դիտորդական առաքելությունը Ուզբեկստանի խորհրդարանի օրենսդիր (ստորին) պալատի ընտրությունները ճանաչել է ժողովրդավարական և թափանցիկ: Այս մասին հայտարարել է առաքելության ղեկավար, ԱՊՀ գործադիր կոմիտեի նախագահ Սերգեյ Լեբեդևը:
Ուզբեկստանի խորհրդարանի օրենսդիր պալատի (Օլի Մեջլիս) ընտրությունները կայացել են դեկտեմբերի 22-ին:
«Առաքելությունը գտնում է, որ ընտրություններն անցել են Ուզբեկստանի սահմանադրության և հանրապետությունում գործող օրենսդրության համաձայն, եղել են ժողովրդավարական և թափանցիկ… Դիտորդների համար ստեղծվել են բոլոր անհրաժեշտ պայմանները, ներառյալ հանդիպումները ընտրատարածքների և ընտրատեղամասերի ղեկավարների, ինչպես նաև ընտրություններին մասնակցող քաղաքական կուսակցությունների ներկայացուցիչների հետ»,- ասել է Լեբեդևը ճեպազրույցի ժամանակ:
ԱՊՀ առաքելության կազմում ընդգրկված են 182 դիտորդներ, որոնք ներկայացնում են Ադրբեջանը, Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը, Թուրքմենստանը, ԱՊՀ անդամ պետությունների միջխորհրդարանական վեհաժողովը, ինչպես նաև ԱՊՀ գործադիր կոմիտեն:
Նախնական տվյալներով ընտրություններին մասնակցել է ավելի քան 13.3 միլիոն մարդ կամ ընտրողների ընդհանուր թվի շուրջ 71.1%-ը: