Ռուս թենիսիստուհի Ալիսա Կլեյբանովայի մոտ հայտնաբերվել է լիմֆատիկ հանգույցների երկրորդ աստճանի քաղցկեղ: Այս մասին հաղորդում է L’Equipe-ը` հղում անելով Tennis Channel-ին: Այս պահին Ալիսան վերականգնողական կուրսեր է անցնում Իտալիայում:
Երեկ` իր ծննդյան օրը, ռուս թենիսիտուհին հաստատել է առողջական վիճակի մասին լուրերը` նշելով, որ ամեն կերպ պայքարում է նորից կորտ վերադառնալու համար:
«Այսօր իմ ծննդյան օրն է և ցանկանում եմ բոլորին շնորհակալություն հայտնել հիասքանչ հաղորդագրությունների ու շնորհավորանքների համար: Ես երկար ժամանակ չեմ գրել` ինչո՞ւ կորտ դուրս չեմ գալիս և որոշեցի այսօր պատմել:
Այժմ իմ կյանքում դժվար փուլ է սկսվել: Առողջությանս հետ խնդիրներ են ծագել: Քաղցկեղ է հայտնաբերվել: Այժմ բուժվում եմ Իտալիայում: Ամեն ինչ լավ է ընթանում, հարկավոր է համբերատար լինել: Ես պարտավոր եմ կամք դրսևորել և ուժեղ լինել, որ կարողանամ հաղթահարել այս ամենը: Եթե բուժումներս հաջող ընթանան և ինձ լավ զգամ, ապա մի քանի ամսից կվերադառնամ կորտ: Ես շատ եմ կարոտել թենիսը, երկրպագուներիս, ընկերներիս և ամբողջ աշխարհին»,- Ալիսա Կլեյբանովայի խոսքերն է մեջբերում Eurosport-ը:
Կլեյբանովան դեռ փետրվարին տեղ էր զբաղեցնում աշխարհի ուժեղագույն թենիսիստուհիների 20-յակում: Այժմ նա WTA վարկանիշային աղյուսակում 28-րդն է:
Ալիսա Կլեյբանովան իր կարիերայի ընթացքում, որը սկսվել է 2003 թվականից, հաղթող է ճանաչվել երկու մրցաշարերում` Կուալա Լամպուրում և Սեուլում, երկու մրցանակն էլ նվաճել է նախորդ մրցաշրջանում:
