Եվրախորհրդարանը չորեքշաբթի՝ դեկտեմբերի 18-ին, ընդունել է բանաձև, որով կոչ է անում Մալթայի վարչապետ Ջոզեֆ Մուսկատին անհապաղ հրաժարական տալ: Այս մասին հաղորդվել է Եվրախորհրդարանի կայքում:
Փաստաթղթի օգտին քվեարկել է 581 պատգամավոր, 26-ը դեմ է արտահայտվել, 83-ը ձեռնպահ է մնացել:
Բանաձևում լուրջ կասկածներ են հայտնվում լրագրող Դաֆնե Կարուանա Գալիցիայի սպանության գործով անաչառ հետաքննության հնարավորության վերաբերյալ, քանի դեռ Մուսկատը կառավարության ղեկավարն է:
Եվրախորհրդարանը քննադատել է այն փաստը, որ կոռուպցիայի և փողերի լվացման դեպքերի հետաքննությունը, որոնք կապված են լրագրող Գալիցիայի սպանության հետ, ոչ թե առաջ չի գնում, այլ նույնիսկ չի սկսվում:
Հետևաբար, ինչպես նշվում է բանաձևում, անցած մի քանի տարում Մալթայում տեղի ունեցող իրադարձությունները երկարաժամկետ սպառնալիք են ներկայացնում օրենքի գերակայության, ժողովրդավարության և հիմնարար իրավունքների համար:
Բացի այդ, Եվրախորհրդարանը պահանջում է ներդրողների համար չեղյալ համարել Մալթայում քաղաքացիության և կացության սխեմաները, քանի որ նրանք «արդյունավետորեն վաճառում են ԵՄ քաղաքացիությունը և սպառնալիք են ստեղծում փողերի լվացման դեմ պայքարի, միջսահմանային հանցավորության դեմ պայքարի և Շենգենյան գոտու ամբողջականության դեմ»:
