Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը երեկ ահազանգել էր, որ Դիլիջանի 2-րդ դպրոցում երեխաների նկատմամբ վատ վերաբերմունք են ցուցաբերում։ «Շարունակում եմ ահազանգ ստանալ Դիլիջանի 2-րդ դպրոցում /տնօրեն Մ. Մեջինյան/ աշակերտների նկատմամբ վատ վերաբերմունքի մասին: Ցավոք, ահազանգողը չի համարձակվում հրապարակավ հանդես գալ, վախենալով իր երեխայի նկատմամբ հնարավոր ավելի վատ վերաբերմունքի պատճառով: Սա այն եզակի դեպքերից է, երբ մարդն ըստ էության մնացել է միայնակ իր խնդիրների հետ և վախենում է հրապարակավ հանդես գալ՝ խուսափելով հնարավոր վատ վերաբերմունքից թե՛ իր, թե՛ իր երեխայի նկատմամբ, բայց միաժամանակ վիճակը չի փոխվում: Անչափ նման է քրեակատարողական հիմնարկում գտնվող մարդու վիճակին, բայց ստիպված եմ այս կերպ ահազանգել»,- սոցցանցի իր էջում գրել էր իրավապաշտպանը և խնդրի վրա հրավիրել Տավուշի մարզպետի, Տավուշի մարզպետարանի կրթության վարչության պետի ուշադրությունը՝ հորդորելով ի վերջո այցելել Դիլիջանի այս դպրոցը, իրականացնել իրենց լիազորությունները և ուսումնասիրություն կատարել այս ահազանգի հետքերով:
Իրավապաշտպանը մեզ հետ զրույցում էլ հրաժարվեց կոնտակտներ փոխանցել դժգոհություններ հայտնած ծնողից: Ասաց, որ վերջինիս համաձայնությունը չունի:
Դիլիջանի 2-րդ դպրոցի տնօրեն Մարինե Մեջինյանը «Առաջին լրատվական»-ի հետ զրույցում ասաց, որ Սաքունցի գրառումը կարդալուց հետո, ինքն էլ է զանգել իրավապաշտպանին, հետաքրքրվել, թե ինչի՞ հետ է կապված խնդիրը: Բացի դրանից՝ տնօրենը փոխանցեց նաև, որ ահազանգի հետքերով մարզպետարանի համապատասխան պաշտոնյաները ժամանել են դպրոց: «Մենք դպրոցում 700 աշակերտ ունենք, նույնքան էլ ծնող։ Ես չեմ կարող ասել, թե որին ինչը դուրս չի եկել, ով ինչի մասին է գրել: Սաքունցն ասաց, որ ծնող կա, որը բողոքում է ձեր դպրոցից, բայց չասաց, թե ով է: Ասաց, որ առաջիկա օրերին կգա մեր դպրոց: Ես ուրախ կլինեմ, թող գա, եթե խնդիր կա, ապա այդ ծնողին էլ կկանչենք, կխոսենք, ու եթե խնդիր կա, արմատախիլ կանենք այդ խնդիրը»,- ասաց Մարինե Մեջինյանը՝ հավելելով, որ առկա խնդիրը լուծելն ավելի է դժվարանում, քանի որ հայտնի չէ, թե դժգոհողն ով է։ «Ինձ թվում է՝ երևի ինչ-որ մեկը ինչ-որ ուսուցչից է դժգոհել, իսկ թե որ ուսուցչից՝ չգիտեմ, բայց կպարզենք, կտեղեկանանք»,- եզրափակեց տնօրենը՝ խոստանալով ավելի ուշ պատասխանել մեր հարցերին, երբ դպրոց ժամանած հանրակրթության բաժնի պատասխանատուները ծանոթանան խնդրին:
Սակայն ավելի ուշ տնօրենն անհասանելի դարձավ:
