ԱՄՆ-ը Ուկրաինային կհատկացնի 50 մլն դոլարի օգնություն՝ քաղաքական և տնտեսական բարեփոխումների իրականացման համար: Այս մասին հայտնում է ITAR-TASS-ը:
Օգնությունն ուղղված է «Միացյալ Նահանգների և Ուկրաինայի միջև գործընկերության ամրապնդմանը»՝ ասվում է Սպիտակ տան հայտարարության մեջ:
Նշված գումարից 11.4 մլն դոլարը նախատեսված է մայիսի 25-ին Ուկրաինայում նախագահական ընտրությունների կազմակերպման համար: «Այդ միջոցները հատկացվում են ժողովրդավարական գործընթացներին աջակցելու համար, ոչ թե որևէ կոնկրետ թեկնածուի օգնելու»,- նշում է Սպիտակ տունը:
Բացի դրանից՝ ԱՄՆ-ը 8 մլն դոլար է հատկացնում Ուկրաինայի զինված ուժերին օգնելու համար, բայց այն չի նախատեսում զենքի մատակարարում: Այդ միջոցները կուղղվեն կապի միջոցների, ինժեներական սարքավորումների, տանսպորտային միջոցների ձեռք բերմանը:
ԱՄՆ-ը նաև Ուկրաինա կուղարկի իրավունքի ոլորտի մասնագետների, որոնք իրենց ուկրաինացի գործընկերներին կօգնեն կազմակերպել տեղի իշխանական մարմինների և դատական համակարգի աշխատանքը:
ԱՄՆ-ը մտադիր է Ուկրաինային օգնել նաև կոռուպցիայի դեմ պայքարում:
