Грузия Online-ի փոխանցմամբ՝ Բրյուսելում գտնվող ՆԱՏՕ-ի շտաբ-կայանում տեղի է ունեցել ՆԱՏՕ-Վրաստան հանձնաժողովի նիստը։ Հանդիպումը նվիրված է եղել էներգետիկ հարցերին և էներգոհատվածում տիրող իրավիճակին, ինչպես նաև տվյալ ոլորտում Վրաստանի իրականացրած բարեփոխումներին։
Նիստի ժամանակ քննարկվել են էներգետիկ անվտանգության հարցերով այլ երկրների ու ռազմավարական գործընկերների հետ Վրաստանի համագործակցության հեռանկարները։
Վրացական կողմի կարծիքով՝ ՆԱՏՕ-Վրաստան հանձնաժողովը լավագույն գործիքն է թե՛ բարձր, թե՛ փորձագետների մակարդակով կարևորագույն հարցերի քննարկման համար։
Հիշեցնենք, որ ՆԱՏՕ-Վրաստան հանձնաժողովը ստեղծվել է 2008 թվականի սեպտեմբերին` որպես քաղաքական խորհրդատվության ու գործնական համագործակցության ֆորում, որը նպաստելու է ՆԱՏՕ-ին Վրաստանի անդամակցությանը: