Երրորդ նախագահ Սերժ Սարգսյանին առաջադրված մեղադրանքից հետո քաղաքական դաշտում հնչեցին ամենատարբեր քննարկումները։ Եթե հեղափոխության աջակից ուժերը կարծում են, որ մեղադրանքը թույլ է և Սարգսյանին կարելի է մեղադրել ոչ միայն մոտ կես միլիարդ դրամի հափշտակության համար, այլ իր իշխանության օրոք գործած շատ քայլ հանցանքների, ապա վերջինս գլխավորած կուսակցությունը շատ արագ Սարգսյանին հռչակեց քաղհալածյալ, իսկ նրան առաջադրված մեղադրանք էլ «օդ»։
ՀՀԿ փոխնախագահ Արմեն Աշոտյանը մասնավորապես նշել է.«Երրորդ նախագահ, մոտ քսան տարի Հայաստանում իշխած Հանրապետական կուսակցության ղեկավար Սերժ Սարգսյանին առաջադրված մեղադրանքը «օդ է և այն արագացնում է հականիկոլական կոնսոլիդացիան»։
«Սասնա ծռեր» համահայկական կուսակցության քարտուղարության անդամ Վահագն Ավագյանն «Առաջին լրատվական»-ի հետ զրույցում նշեց.«Հայաստանի Հանրապետական «կուսակցության» վերաբերյալ մեր մեկնաբանությունները չեն փոխվել, չենք համարում իրենց քաղաքական երևույթ, քաղաքական հարցերի շուրջ հավաքված խումբ։ Դա հանցավոր խումբ է, քրեական հանցագործների միավորում, որն ընդամենը ներկայանում է որպես քաղաքական ուժ։ Իսկ մենք նրանց ելույթների վերաբերյալ որևէ մեկնաբանություն չունենք»։
Ըստ Ավագյանի՝ նրանց տեղը Նյուրնբերգյան դատավարության ամբաստանյալի աթոռն է.«Մենք այդ խմբակին վերաբերում ենք որպես քրեական հանցագործների մի խմբի, որոնք զավթել էին հայ ժողովրդի իշխանությունը։ Իրենց որևէ մեկնաբանության մեջ քաղաքական տարր չենք փնտրում»։
Մեր այն հարցին՝ արդյոք առաջադրված այս մեղադրանքը հանրային սպասումները կբավարարի, Վահագն Ավագյանը պատասխանեց.«Ես հանրային սպասումների առումով որևէ բան չեմ նշի, չնայած դուք ինքներդ էլ կռահում եք , թե դրանք ինչպիսին են։ Բայց այդ մարդը մոտ 30 տարի Հայաստանի Հանրապետությունում զբաղեցրել է ամենաբարձր պաշտոնները և ակտիվ ու շատ կարևոր դերակատարում է ունեցել հայ ժողովրդի իշխանության զավթման մեջ։ Հետևաբար եթե նայենք մարդկության վերաբերմունքին ու մարդկության կողմից նման մարդկանց հանցագործությունների գնահատականին ու պատժին ու համեմատենք այն մեղադրանքների հետ, որոնք մի քանի օր առաջ ՀՔԾ-ն առաջադրել է Սերժ Սարգսյանին՝ կարող ենք տեսնել, ըստ էության այն աշխատանքի թերությունը, սնանկությունը , որը ցուցաբերվում է ՀՔԾ-ի կողմից»,-եզրափակեց նա։
