Վերջին շաբաթը հայ-ռուսական հարաբերություններում նշանավորվեց յուրօրինակ վանդալիզմի փոխանակման մեկական ակտերով. ռուս պատգամավոր Ա. Վինոգրադովը սև ներկով ներկեց Կրասնոդարի երկրամասի Արմավիր քաղաքում գտնվող Գարեգին Նժդեհի հիշատակը հավերժացնող հուշատախտակը: Ի պատասխան՝ Երևանի կենտրոնում տեղակայված Ալեքսանդր Գրիբոյեդովի արձանը կարմիր ներկով ներկեց քաղաքացիական ակտիվիստ Շահեն Հարությունյանը:
«Առաջին լրատվական»-ի հետ թեմայի շուրջ զրույցում պատմաբան Վահրամ Թոքմաջյանը, անդրադառնալով հարցին, թե Նժդեհի կերպարի շուրջ հիստերիան և նրան ֆաշիստ անվանելն ինչ նպատակ է հետապնդում, նշեց, որ ռուս պատգամավորի գործողությունը չի կարելի վերագրել ամբողջ ռուսական իշխանությանը, ռուսական քաղաքական միջավայրը բազմաշերտ է… Բացի դրանից՝ ռուսական որոշ շրջանակների մոտ այդ հիստերիան նորություն չէ, դա լայն թափ առավ այն ժամանակ երբ երևանում կանգնեցրին Գարեգին Նժդեհի արձանը: «Այն ժամանակ իշխանությունների պատասխանը կրավորական էր, թեև իրենց Նժդեհի գաղափարների կրող էին հայտարարել»:
Կրասնոդարի երկրամասում տեղի ունեցածը, պատմաբանի գնահատմամբ, սադրանք էր Հայաստանի Հանրապետության հանդեպ. «Կարծում եմ, որ այդ պատգամավորն ինքնագլուխ չի գործել, հնարավոր է, որ նրա արարքի հետևում թաքնված լինեն մեր արևելյան հարևանի՝ ոչ բարիդրացիական տրամադրություններ ունեցող պետության որոշակի շրջանակներ:
«Նժդեհի գաղափարի մեջ, որպես հերոսի գաղափարի մեջ, արտացոլվում է հայկական պետականության, ինքնիշխանության և ինքնության գաղափարը, և շատ կարևոր է, թե կայսերական նկրտումներ ունեցող երկրների ինչ մշակութային կոդերի է հարվածում»,- նշեց պատմաբանը՝ ընդգծելով, որ Նժդեհը ֆաշիստ չէր:
Մանրամասն՝ տեսանյութում:
