Մադրիդի «Ռեալ»-ի առաջատար Քրիշտիանու Ռոնալդուն հարցազրույց է տվել ֆրանսիական So Foot ամսագրին.
«Ես միշտ հետևել եմ ֆուտբոլիստներին, ովքեր խաղադաշտում ներդնում են իրենց ողջ ուժերը: Գերազանց ֆուտբոլիստների ու աստղերի տարբերության գաղտնիքը կատարած աշխատանքի մեջ է:
Խաղացել եմ բազմաթիվ տաղանդավոր ֆուտբոլիստների հետ: Ավելի տաղանդավոր, քան ե՞ս. չեմ կարող ասել: Գնահատականի չափանիշը, որը երբեք չի փոխվում, կայունությունն է: Որոշ խաղացողներ լավ են անցկացնում 5, 10 կամ 15 խաղ, բայց պետք է լավ խաղալ մրցաշրջանի բոլոր 60 խաղերում:
Իսկ կայունության գաղտնիքը լավ քունն է, հանգիստն ու սնունդը: «Ոսկե գնդակ»-ը ստանալուց հետո ավելի շատ եմ աշխատում, որպեսզի զգամ, որ արժանի եմ այդ մրցանակին:
Բազմաթիվ սխալներ եմ գործել, որոնց շնորհիվ ավելի ուժեղ եմ դարձել: Լավագույն որոշումներն եմ կայացնում խաղադաշտում, և այն, որ հայր եմ դարձել, օգնում է հանգստություն պահպանել և լինել համբերատար:
Ժամանակն իր գործն արել է, բայց շատ մարդիկ կարող են ինձ վատ մարդ համարել այն ամենի համար, ինչ արել եմ կարիերայիս սկզբում:
Ձգտում եմ լավագույնը լինել յուրաքանչյուր խաղում: Այդ առումով երբեք ոչինչ չի փոխվի: Ինքս եմ ինձ վրա ճնշում գործադրում, այլապես ավելի վատ ֆուտբոլիստ կլինեի:
Կցանկանայի աշխարհի ու Եվրոպայի չեմպիոն դառնալ Պորտուգալիայի հավաքականում: Դա տորթի վրայի բալը կլիներ իմ կարիերայում: Գիտեմ, որ բարդ է լինելու, բայց ամեն ինչ հնարավոր է ջանասիրաբար աշխատելու պարագայում»:
